Nga Erblina Mile
Kriza e çmimeve duket se nuk ka stepur shqiptarët për blerjen e një shtëpie. Sipas të dhënave të Bankës së Shqipërisë vetëm gjatë muajit mars janë marrë hua rreth 5 miliardë lekë për blerjen e një banese. Ky rezulton se është niveli më i lartë në dekadën e fundit.
Nëse e krahasojmë me një vit më parë vërehet një rritje me të paktën 2 miliard lekë. Banka Qendrore thekson se kërkesa e lartë për kredi për blerje banese, ka bërë që bankat t`i financojnë individët me ritme të larta dhe niveli i huasë për individë është zgjeruar me 16.3%. Përtej kërkesës, në shtimin e nivelit të kreditimit për blerje banesash ka ndikuar edhe konkurrenca e shtuar mes bankave duke bërë që standardet e kreditimit të jenë lehtësuese ndërsa normat e interesit në nivele të ulëta.
Sipas të dhënave në tre muajt e parë të këtij viti është konstatuar rritje e kreditimit në valutë për individët, e cila për herë të parë në vitet e fundit u rrit më shumë se sa ai në lekë. Kështu, kredia në valutë u rrit mesatarisht me 17.4% vit ndërsa në lekë 14.7%.
Por pavarësisht kësaj 65 % e totalit të huave për individë janë në lekë e ndikuar kjo edhe nga të ardhurat të cilat i kanë kryesisht në këtë monedhë.
Norma mesatare e interesit për kreditë në lekë për individët u rrit lehtas këtë tremujor, duke shënuar 6.5% nga 6.0% që ishte një tremujor më pare duke i bërë kreditë në lekë më të shtrenjta . Kjo si pasoje e rritjes së normës së interesit nga Banka e Shqipërisë. /abcnews.al
