Epiqendra e tërmetit që tronditi ditën e sotme Turqinë dhe Greqinë ishte 13 kilometra në verilindje të ishullit Samos. Një emigrante shqiptare që jeton në këtë ishull grek u rrëfeu për Abcnews.al momentet e vështira që kaluan.
Lexo edhe: Shqiptarja për Abcnews.al nga Izmiri: Po nxjerrin njerëz të gjallë nga rrënojat
“Ishte e tmerrshme, dolëm me shpejtësi jashtë. Fatmirësisht jemi mirë. Edhe shqiptarët e tjerë që jetojnë në këtë ishull janë mirë dhe nuk kemi informacione se janë lënduar nga shembjet.
Akoma jemi në panik dhe frikë. Nuk e kemi ku do të kalojmë natën, pasi kemi frikë që të qëndrojmë brenda” tha emigrantja shqiptare për Abcnews.al.
Lexo edhe: Studenti shqiptar tregon për Abcnews.al momentet e tmerrit në Izmir
Dëmet më të mëdha nga tërmeti u regjistruan në Izmir të Turqisë. Deri tani raportohet se në Turqi janë regjistruar 6 viktima dhe 321 të lënduar, ndërsa fatkeqësisht bilanci negativ pritet që të rritet në orët në vijim pasi grupet e kërkim shpëtimit vijojnë operacionet në godinat e shembura./ db/Abcnews.al
