Një bandë që grabiste bankomate është shkatërruar në Alicante të Spanjës. Në pranga kanë rënë shtatë persona, katër prej të cilëve shqiptarë. Sipas asaj që shkruajnë mediat, të përshirë në këtë grup kriminal janë edhe dy serbë dhe një spanjoll.
Për të kryer grabitjet, banda përdorte kamionçina me të cilat hapte bankomatet. Shqiptarët, dhe serbët akuzohen për grabitje me forcë të pikave të ATM-ve, vjedhje makine, falsifikim të targave dhe pjesëmarrje në grup kriminal.
Operacioni ndaj këtij grupi u krye pasi raportimeve për vjedhje të ndryshme të kryera gjatë muajve Janar dhe Mars në provincat e Alicante-s, Albacete-s, Valencia-s dhe Murcia-s. Kjo shpërndarje gjeografike e grabitjeve bëri autoritetet të dyshojnë se grupi ndodhej në jug të provincës së Alicante-s.
Shumë shpejt u zbulua se hajdutët vepronin orët e para të mëngjesit në rrugët dytësore ku në disa prona industriale vidhnin kamionçina. Më vonë i përdorin këto të fundit për të shkatërruar bankomatet, ku merrnin paratë. Sipas autoriteteve spanjolle, ky grup është autor i të paktën 9 grabitjeve të kryera në disa zona të ndryshme.
Të premten e kaluar, ata kryen edhe grabitjen e fundit në Archivel të Murcia-s. Ky rezultoi dhe gabimi i tyre pasi atë mëngjes u arrestuan edhe shtatë anëtarët e bandës dhe u sekuestruan 48 mijë euro që ishin vjedhur në bankomat.
Pas një kontrolli në banesat e tyre, policia sekuestroi edhe 14.500 euro të tjera, makineri të ndryshme, 6 makina, maska për ski, xhaketa, kapuça dhe doreza, të cilat dyshohen se përdoreshin për të kryer krimet.
Pas arrestimeve ata u dërguan para gjykatës, ku 6 prej tyre u dënuan pa të drejtë lirimi me kusht, ndryshe nga spanjolli, i cili sipas autoriteteve kishte bashkëpunuar vetëm për grabitjen e makinave./abcnews.al
