Loading ...
Shqiponjave në kryeqytet u ka mbetur vetëm një kamera sigurie funksionale që mbahen në trupin e tyre për të bërë transparente ngjarjet ku marrin pjesë. ABC mëson se pajisjet e tjera janë dëmtuar duke i hedhur në magazinë.
Kompania private që fitoi tenderin në vitin 2016 nuk parashikonte në kontratë rregullimin e tyre dhe ministria e Brendshme që prej vitit 2016-të nuk e ka marrë mundimin që të hap një tender për këtë shërbim duke mos i rikthyer më në punë këto pajisje.
Vrasja e Klodian Rashësh nga efektivi i Shqiponjave, nxori në pah një problematikë në Policinë e Shtetit. Ajo, që në 2 shkurt të 2016-ës do të prezantohej nga ish ministri i Brendshëm Saimir Tahiri si një sukses, tashmë ka ngelur në sirtarët e magazinave.
Dixhitalizimi, inovacioni dhe instrumente të tillë si kamerat e trupit i japin mundësinë qytetarit të ndihet i garantuar nga puna e përditshme e punonjësit të Policisë. Por është dhe një instrument sigurie për punonjësit e policisë që e kryejnë detyrën në mënyrë të përshtatshme dhe në bazë të ligjit.
ABC mëson se punonjës të policisë në kryeqytet, e kryesisht ata të forcave “Shqiponja” e të rendit, kanë mungesë të theksuar të kësaj pajisjeje. Pasi janë dëmtuar, ato janë çuar në magazinën e Drejtorisë së Policisë Tiranë. kompania private që fitoi tenderin e kamerave të trupit të policisë nuk parashikonte mirëmbajtjen apo rregullimin e tyre, por vetëm shitjen.
Kamera e trupit u konsiderua si një element tepër i rëndësishëm për të bërë transparencë nga uniformat blu. Por edhe pse në mungesë të kamerave, prej më shumë se një viti, Ministria e Brendshme nuk ka hapur asnjë tender për rregullimin e tyre.
E tillë ishte edhe situata me vrasjen e Klodian Rashës. Efektivët e “Shqiponjave” nuk kishin të instaluar në trup asnjë pajisje të tillë, e cila do të shërbente edhe më shumë në zbardhjen më të shpejtë të atij krimi. të vetmen kamera trupi që zotëronte atë ditë “Shqiponja” i ishte lënë një tjetër grupi patrulle në terren.
Në fillim të 2017-ës, prokuroria nisi hetimet për abuzim me tenderin e kamerave, pas kallëzimit penal që bëri Kontrolli i Lartë i Shtetit për 4 punonjës të Policisë të cilët kishin hartuar referencat e tenderit, si dhe për 3 anëtarë të Komisionit të Vlerësimit të Ofertave.
Në atë kohë, KLSH deklaroi se kamerat e trupit të efektivëve të policisë janë blerë 7 herë më të shtrenjta se çmimi i tregut vendas dhe të huaj.
Kontrolli i Lartë i Shtetit konstatoi se vlera e tenderit ishte 541 milionë lekë, kurse dëmi i shkaktuar buxhetit kapte vlerën e 189 milionë lekëve. KLSH thotë se tenderi u klasifikua qëllimisht “sekret” për të shmangur konkurrencën. Ndërsa konkluzionet e auditit u bënë publike në raportin e KLSh për Policinë e Shtetit për periudhën 2014-2016./abcnews.al
