Shpërthimet në veri të Kosovës, Kurti: Bandat kriminale të dirigjuara nga Vuçiç kanë intensifikuar sulmet, e dinë se po ju vjen fundi

schedule21:22 - 6 Dhjetor, 2022

schedule 21:22 - 6 Dhjetor, 2022

Kryeministri i Kosovës, Albin Kurti ka hedhur akuza ndaj presidentit serb, Aleksandër Vuçiç se qëndron pas sulmeve në veri të Kosovës. Kurti shprehet se Kosova nuk bën pazare ndërsa shton se “Bombat që hedhin, plumbat që shkrepin dhe maskat që vendosin janë pafuqia e tyre politike e popullore”.

Bandat kriminale kanë intensifikuar sulmet në veri të Kosovës. Ato e dinë se po ju vie fundi. Qeveria e Kosovës as s’bën pazare me to dhe as s’i duron ato. Bombat që hedhin, plumbat që shkrepin dhe maskat që vendosin janë pafuqia e tyre politike e popullore. Me këto krime e sulme të armatosura në veri të Ibrit, doemos do të kemi më shumë polici të Kosovës atje.

Sepse do të ketë hetime e ndjekje të këtyre kriminelëve, që paguhen nga Serbia e dirigjohen nga presidenti i saj. Shkeljet e shumta të ligjit nuk do të falen kurse tendencat për destabilizim kriminal do të dështojnë. Në katër komunat në veri nuk është ndarja në serbë e shqiptarë, por në banda kriminale dhe qytetarë. Kërkoj nga të gjithë qytetarët e Kosovës që të mbështesin shtetin dhe policinë e Kosovës, të gjithë zyrtarët tanë që po mbrojnë kushtetutshmërinë dhe ligjshmërinë, republikën dhe demokracinë.”, shkruan Kurti./abcnews.al