albin kurti
ger ta16:03 | 29/03/2020
Kryeministri në detyrë, Albin Kurti, ka bërë një interpretim Kushtetutës, duke nxjerr përfundime se s’mund të themelohet Qeveri e re pa shkuar në zgjedhje të reja.
Kurti ka anashkaluar dy mundësitë që ofrohen në Kushtetutë për themelim të Qeverisë, por ka thënë se bazuar në praktikat e mëparshme duhet të shpallen zgjedhjet e jashtëzakonshme që do të mbaheshin pasi të përfundojë koronavirusi.
Kurti i është drejtuar me një mesazh Presidentit Hashim Thaç, duke i thënë se para se të kërkojë emrin e kandidatit nga Lëvizja Vetëvendosje, Presidenti duhet të mendojë për datë të zgjedhjeve për të gjithë
“Përfundimisht, para se të kërkojë emrin e kandidatit nga Lëvizja VETËVENDOSJE!, Presidenti duhet të mendojë për datë të zgjedhjeve për të gjithë. Sepse ai duhet ta zbatojë Kushtetutën e jo ta interpretojë atë”, ka shkruar Kurti, në një postim të gjatë në FB.
“Kushtetutëdhënësi e ka bërë të qartë se një mocion mosbesimi i suksesshëm prodhon zgjedhjet dhe jo një qeveri tjetër, me faktin se nuk ka paraparë asnjë procedim tjetër në Kushtetutë, për dallim nga dorëheqja, pas së cilës Kushtetuta ka paraparë që Presidenti fillon konsultimet me partinë apo koalicionin fitues”, ka shtuar ai.
Postimi i Kurtit:
Neni më i rëndësishëm i Kushtetutës së Republikës së Kosovës për ecjen përpara është ai 82.2: “Kuvendi mund të shpërndahet nga Presidenti i Republikës së Kosovës, pas votimit të suksesshëm të mosbesimit të Qeverisë”. Këtu, folja jokalimtare ‘mund’ nuk është ajo e një mundësie subjektive të zgjedhjes, por e lejes për të proceduar nga një autoritet. Nuk është e rastësishme që në verzionin në anglisht të Kushtetutës sonë, fjala ‘mund’ nuk është ‘can’ por ‘may’. Sëkëndejmi, neni 82.2 është dispozitë e lejimit dhe jo e përzgjedhjes.
Presidenti i Republikës së Kosovës, në vend se të hutohet me nenin 95 te Kapitulli VI i Kushtetutës (Qeveria e Republikës së Kosovës), duhet të fokusohet në nenin 82 te Kapitulli IV (Kuvendi i Republikës së Kosovës). Njëherazi, togfjalëshat e tij kundërkushtetues të deklaruar publikisht si “qeveri e re” apo “kritere mbizotëruese” nuk ndriçojnë rrugën përpara. Përkundrazi.
Në zgjedhjet parlamentare të 6 tetorit 2019, nuk kemi garuar se kush do të bëhet kryetar komisioni parlamentar, shef grupi apo kryetar Kuvendi. Partitë kanë garuar me programe qeverisëse dhe me kandidatë për kryeministra. Kontrata legjitimuese me popullin është ndërprerë dhe duhet të rikthehemi tek ai. Porsa të mbarojë pandemia Covid-19 – të cilën duhet ta luftojmë të gjithë bashkë duke mbështetur dhe ndihmuar e jo duke penguar a sabotuar qeverinë në detyrë – ne duhet të zbresim te populli si burim sovraniteti, për zgjedhje të reja, të lira e demokratike.
Ka dallim thelbësor ndërmjet situatës kur kryeministri dorëhiqet nga posti i tij dhe asaj kur Kuvendi voton mocion mosbesimi ndaj qeverisë. Në rastin e parë kemi mungesë vullneti ose aftësie të vetëdeklaruar nga kryeministri i cili largohet. Në rastin e dytë qeveria dhe kryeministri janë në detyrë, nuk ka vakuum deri në zgjedhjet e reja, andaj edhe stabiliteti e funksionimi shtetëror nuk cënohen. Pra, në rastin e dytë e që është ky yni tani, nevojitet Kuvend i ri për qeveri të re.
Kjo do të jetë hera e tretë e situatës së njëjtë në Kosovën e pavarur: kishim mocione të suksesshme të mosbesimit edhe në vitet 2010 e 2017, pas të cilave Presidenti shpërndante Kuvendin dhe shpalleshin zgjedhjet e parakohshme. Për më tepër, në vitin 2017 ishte po ky President që është tani, dhe, në atë kohë, ai nuk kishte dilemë se cila ishte rruga e duhur pas mocionit të suksesshëm të mosbesimit.
Kushtetutëdhënësi e ka bërë të qartë se një mocion mosbesimi i suksesshëm prodhon zgjedhjet dhe jo një qeveri tjetër, me faktin se nuk ka paraparë asnjë procedim tjetër në Kushtetutë, për dallim nga dorëheqja, pas së cilës Kushtetuta ka paraparë që Presidenti fillon konsultimet me partinë apo koalicionin fitues.
Mocioni i mosbesimit i 25 marsit 2020 ishte i llojit destruktiv: synonte rrëzimin e qeverisë. Kaq. Nuk ishte mosbesim konstruktiv me ç’rast Kuvendit do t’i paraqitej njëkohësisht edhe një ofertë e re për qeveri të ardhshme. Vota PËR me 25 mars 2020 ishte asgjë më shumë sesa votë KUNDËR. Si e tillë ajo shkëputi lidhjen pushtet-popull. E vuri qeverinë në pyetje në mënyrën ku populli (dhe jo Kuvendi) jep përgjigje. Kuvendi e rrëzoi qeverinë në Kuvend. Qeveria në detyrë qeveris.
Përfundimisht, para se të kërkojë emrin e kandidatit nga Lëvizja VETËVENDOSJE!, Presidenti duhet të mendojë për datë të zgjedhjeve për të gjithë. Sepse ai duhet ta zbatojë Kushtetutën e jo ta interpretojë atë.
Igli Nikolli21:58 | 28/03/2020
Rrëzimi i qeverisë Kurti në Kosovë është pritur shumë keq nga pjesa më e madhe e shqiptarëve. Vetëm 51 ditë qëndroi në detyrën e kryeministrit Albin Kurti, lideri i Lëvizjes Vetëvendosja. Ndërkohë që të gjithë shtetet janë të përqendruara në betejën kundër koronavirusit, në tokën dardane një pjesë e kanë mendjen te pushteti dhe nxitojnë për t’i bërë keq “aleatëve”.
Rreth kësaj ndodhie ka reaguar edhe Mërgim Mavraj, kapiteni i kombëtares shqiptare. Qendërmbrojtësi ka përdorur një nga shprehjet e shumta të artistit të madh Unikkatil (Viktor Paloka).
“100 zogj t’pulave kundër 1 LUANI. Me Albinin”, shkruan Mërgim Mavraj, duke shprehur qartësisht mbështetjen e tij për një nga politikanët që ka fituar besimin e shumë shqiptarëve kudo që ndodhen. /abcnews.al
ger ta22:57 | 27/03/2020
Kryeministri në detyrë i Kosovës, Albin Kurti ka reaguar pas deklaratave të Richard Grenell, cili tha se i ishte premtuar heqja e taksës 100%.
Përmes një postimi në Facebook, Kurti shkruan se Grenellin e ka parë në sy dhe kurrë nuk i ka premtuar heqjen e taksës 100%.
“Me ambasadorin amerikan në Berlin, z. Richard Grenell, jam takuar dy herë. Takimi i parë ishte më 9 tetor 2019, në ora 13:45, në Ambasadën e ShBA-ve në Prishtinë. Takimi i dytë ishte më 23 janar 2020, në ora 10:30, në selinë qendrore të LVV. Në takimin e parë me mua ishte z. Glauk Konjufca. Në takimin e dytë me mua ishin z. Glauk Konjufca dhe znj. Fitore Pacolli-Dalipi. Të dy herët, z. Grenell e kam shikuar në sy. Por, asnjëherë nuk i kam thënë që do ta heqim tarifën 100% pa reciprocitet. Është për t’u përshëndetur dhe inkurajues deklarimi i qartë i sotëm i Ambasadorit Grenell kundër planeve për shkëmbim territorial”, shkruan Kurti.
Sot në një intervistë për emisionin ‘Pressing”, Grenell tha se kurti i ka premtuar heqjen e taksës, por nuk e ka bërë një gjë të tillë.
ger ta20:48 | 27/03/2020
Kryeministri në detyrë Albin Kurti ka vizituar sot një zonjë, të cilës 21 vite më parë serbët i vranë 4 djemtë e familjes dhe burrin.
Në foton e publikuar nga Kurti, në shtëpinë e Ferdonije Qerkezi shihen portretet e burrave të familjes dhe tavolina e shtruar për gjashtë persona, ndërsa ajo është e vetme.
Kurti thotë në shënimin e tij në facebook se eshtrat e Artanit dhe Edmondit janë kthyer në atdhe në vitin 2005, ndërsa nuk dihet asgjë për fatin e tre të tjerëve. Sipas Kurtit, ky është një krim i vazhdueshëm e një drejtësie të munguar.
Postimi i plotë:
Sot pasdite bisedova me zonjën Ferdonije Qerkezi nga Gjakova, në ditën që u mbushën 21 vjet prej kur forcat policore të Serbisë ia rrëmbyen katër djemtë dhe burrin: Artanin, Edmondin, Armendin, Ardianin dhe Halimin.
Eshtrat e Artanit e Edmondit janë kthyer në vitin 2005. Asgjë nuk dihet sot e kësaj dite për fatin e tre të tjerëve.
Të pagjeturit janë plagë që kullon ankth. Dhembjet e vuajtjet e nënës Ferdonije sigurisht që ne s’arrijmë t’i marrim me mend.
Ky është një krim i vazhdueshëm pasi që është drejtësi e munguar. Të pagjeturit duhet të jenë çështja e parë në dialogun e ardhshëm Kosovë – Serbi.
in a10:53 | 27/03/2020
Analisti Vigan Qorolli në një lidhje më “ABC e Mëngjesit” ka folur për situatën politike në Kosovë. Ai u shpreh se Kurti tregoi se do të jetë një kryeministër i fortë dhe pa kompromis.
I ndalur te rrëzimi i qeverisë Kurti, analisti theksoi se kjo nuk ishte koha e duhur për këtë mosmarrëveshje politike pasi vendi tashmë i prekur nga pandemia dhe duhet bashkëpunim për të parandaluar përhapjen e COVID-19.
“Ka një keqkuptim të deklaratave amerikane. SHBA kërkon që të hiqet taksa. Deklarata e mbrëmshme e SHBA-ve rikonfirmoi heqjen e taksës. Tashmë taksa ndaj Serbisë rrëzoi dy kryeministra. Qeveria Kurti ra për tu bërë edhe njëherë kurban i mosmarrëveshjes së elitës politike.
Në vend që të bashkohen elitat tona politike u përçanë më tepër. Nuk dimë nëse në ditët në vijim do të kemi një qeveri të re. Në këtë situatë që jemi me pandemi zgjedhjet e jashtëzakonshme janë të pamundura. Ka ende një paqartësi se si do të procedohet më tej”, tha Qorolli.
Gjithashtu ai u shpreh se Albin Kurti tregoi që do të jetë i pamëshirshëm në luftën kundër korrupsionit.
“Të gjitha emërimet që bëri nuk ishin as militantë dhe as familjarë të tij dhe kjo bëri që të rritej besimi. Por Isa Mustafa është politikani më jetëgjatë në Kosovë. Kurti u tregua karrem i fortë edhe për vetë Mustafën edhe pse Mustafa ka një ambicie interesante dhe është një kandidat shumë i fortë si kandidat për postin e Presidentit.
Besoj që arsyet kryesore të mosmarrëveshjes lidhen me taksën”, tha ndër të tjera analisti.
Sid Orela13:08 | 26/03/2020
Të mërkurën mbrëma, Kuvendi i Kosovës ka votuar me 82 vota pro, 32 kundër dhe 1 abstenim mocion i mosbesimit ndaj Qeverisë Kurti.
Kryeministri kosovar në detyrë, Albin Kurti e drejtoi ekzekutivin e vendit për vetëm 51 ditë, duke u bërë kështu Qeveria më jetëshkurtër ndonjëherë në Kosovë. Vetem Vetevendosje dhe 3 deputete te LDK-se, nje prej tyre Vjosa Osmani, votuan kunder mocionit.
Për të folur në lidhje me situatën e pazakontë në Kosovë e ftuar në studio në një bisedë më Juli Xhokaxhi ishte gazetarja e Abc News, Linda Karadaku.
E pyetur sesi mund të rrëzohet një qeveri në kushte të një pandemie globale, gazetarja Karadaku thekson se Kurti ka akuzuar ambasadorin amerikan në Kosovë, Philip Kosnett se qëndron në prapaskenë të gjithë situatës së krijuar.
Më tej theksohet se “se që nga momenti që u krijua koalicioni, dihej se do të ishte shumë i brishtë dhe nuk është e nevojshme ndërhyrja e ambasadorit për t’i dhënë një të shtyrë.
Ajo që bie më shumë në sy, sipas gazetares është numri i madh i deputetëve që votuan për ta rrëzuar qeverinë, pra 82 nga 120 që nga parlamenti votuan “Pro”. Dhe, kjo sipas gazetares tregon se diçka e madhe është në lojë.
Duke marrë parasysh këto fakte, “duket se bëhet fjalë për diçka përtej Albin Kurtit dhe qeverisë së tij. Kosova ndodhet në një situatë kur duhet të mbyllë gjëra të rëndësishme dhe këto nuk mund t’i arrijë me praninë e ngërçeve dhe duke mos u marrë vesh me presidentin e vendit.”
Autor E12:39 | 26/03/2020
Kryeministri në detyrë i Kosovës Albin Kurti e ka cilësuar një rënie për ngritjen e nevojshme votimin e djeshëm nga Kuvendi për shkarkimin e qeverisë së tij.
“Pa rënë qeveria si përbërje nuk bëhet dot qeverisja si përmbajtje”, shkruan ai në Facebook duke shtuar se do të ishte mirë që votimi i mbrëmshëm i Kuvendit të Kosovës të mbahej mend.
Postimi i plotë i Kurtit
Ishte kjo një rënie e domosdoshme për ngritjen e nevojshme. Pa rënë qeveria si përbërje nuk bëhet dot qeverisja si përmbajtje. Jo se e kemi ditur, gjithsesi e morëm vesh.
Mbledhja e djeshme e kuvendit do të ishte mirë të mbahej mend gjatë. Mirëpo, nuk do të ndodhë kështu, sepse ne do të fitojmë. Pra, e ardhmja është e jona, ndërkohë që do ta humbim një tragjedi.
Ky kuvend nuk e beson këtë qeveri sepse i nënshtrohet qeverisë si të tillë. Qeveria jonë nuk e beson këtë kuvend sepse e dashuron kuvendin si të tillë.
Saktë e kishte thënë mbrëmë Prof. Enver Hasani: mosbesimi ishte koniuktural. Kur përfaqësimi demokratik bie në koniukturë politike, tjetërsimi bëhet normë.
Qëllimi i mosbesimit nuk ishte rrëzimi i qeverisë sa dobësimi i qeverisjes. Ndërkaq kuptimi i mosbesimit ishte porosia ambasadorit Grenell: në Kosovë janë mbi 80 deputetë të gatshëm të rrezikojnë edhe jetët e qytetarëve vetëm që të kalojë shkëmbimi presidencial.
Do të vazhdojmë si qeveri në detyrë. Jemi qeveri me detyra dhe jo qeveri e detyruar.
Para së gjithash, duhet ta luftojmë bashkë pandeminë Covid-19. Mbi të gjitha, le t’i rrimë popullit afër se Kosova është shtëpia jonë.
Vladimir Prenga09:17 | 26/03/2020
Qeveria “Albin Kurti” ka rënë një ditë më parë dhe reagimet kanë qenë të shumta, pro dhe kundër. Politikisht Vetëvendosja mund të ketë dalë e fituar, pasi me shumë mundësi në zgjedhjet e ardhshme do të marrë edhe më shumë vota. Të paktën të tilla janë pritshmëritë.
Mes reagimeve të shumta spikat ajo e kapitenit të përfaqësueses së Kosovës, qendërmbrojtësit Amir Rrahmani. Lojtari i Hellas Verona, i cili në verë do të kalojë te Napoli, e konsideron të pakuptueshme atë që ndodhi një ditë më parë në Kosovë.
“Asnjëherë nuk jam marrë me politikë, por në një situatë pandemie të kenë më shumë rëndësi interesat personale se sa shëndeti i kosovarëve, nga të cilët nesër do të kërkojnë votën prapë, është e pakuptueshme.
Edhe sa duhet te presim që Kosova të bëhet një shtet evropian? Si çdo kosovar, edhe unë dua që shteti im të përparojë, që të kemi një jetë më të mirë të gjithë sepse një ditë edhe unë dua të kthehem dhe të jetoj aty. Është vendi i ynë. E DUA.
Njeriu që ka marrë vota nga populli më së shumti në 15 vitet e fundit, BIE. Bie edhe fjala e popullit”, përfundoi shkrimin e tij kapiteni kosovar”, shkruan Rrahmani, i cili postimin e tij e shoqëron edhe me një foto, ku bëhen një krahasim i Kurtit me personalitete si Hasan Prishtina dhe Fan Noli. /abcnews.al
in a07:46 | 26/03/2020
Kryeministri në detyrë i Republikës së Kosovës, Albin Kurti, ka marrë vendim për lirimin nga posti i zëvendëskryeministrit të parë në detyrë, Avdullah Hoti.
Ky vendim nga Kurti është bërë sonte pas miratimit të mocionit të mosbesimit, që e rrëzoi qeverinë e tij.
“Z. Avdullah Hoti, lirohet nga posti i Zëvendëskryeministrit të Parë në detyrë”, shkruhet në komunikatën për media.
in a12:06 | 25/03/2020
Duke iu përgjigjur Presidentit Hashim Thaçi, Kurti shkruan në rrjetin social “Facebook” se përplasja me presidentin ka ardhur në një kohë të papërshtatshme.
“Lufta e presidentit kundër këtyre rekomandimeve ka ardhur në kohën më të papërshtatshme të mundshme”, shprehet Kurti.
Ndërkohë sipas ekspertëve të IKSHP-së, Kosova po futet në dy javët më kritike, kur rreziku për përhapjen e përshpejtuar të virusit është në nivelin më të lartë.
Statusi:
Të dashur qytetarë,
Me vendimin e saj të ditës së hënë, Qeveria e Republikës së Kosovës, me një votë gati unanim, miratoi masa të reja të rekomanduara nga Instituti Kombëtar të Shëndetit Publik, për të fituar sa më bindës dhe sa më shpejt betejën tonë të përbashkët kundër virusit COVID-19. Po të njëjtën natë, presidenti i Republikës së Kosovës ndërmori një hap të paprecedentë dhe të papërgjegjshëm por, fatkeqësisht, jo edhe të papritur, duke iu bërë thirrje qytetarëve dhe zyrtarëve policorë që të rezistojnë zbatimin e Vendimit të Qeverisë dhe, në këtë mënyrë, duke rrezikuar drejtpërdrejt shëndetin publik të qytetarëve dhe banorëve të Republikës sonë.
Ndërsa, dje në mëngjes, presidenti vazhdoi edhe më tej betejën e tij kundër rekomandimeve të IKShP-së, duke e kontestuar Vendimin e Qeverisë në Gjykatën Kushtetuese të Republikës së Kosovës.
Përkundër gabimeve elementare juridike dhe pretendimeve që nuk qëndrojnë fare, të bëra nga presidenti në kërkesën e tij, unë dhe Zyra ime dërguam përgjigje në kërkesën e presidentit mbrëmë para orës 22:00, në të cilën përgjigje kemi sqaruar qëndrimin tonë në lidhje me argumentimin prima facie të kërkesës, pretendimin e presidentit për dëmin e pariparueshëm si dhe në lidhje me interesin publik.
E kemi bërë të qartë konsiderimin tonë se Rregullorja e Punës së Gjykatës Kushtetuese ka përcaktuar qartë në Rregullin 57.4 shkronjat (a), (b) dhe (c) se në mënyrë kumulative duhet plotësuar kriteret e përcaktuara me këtë dispozitë. Presidenti në këtë rast duhet në mënyrë kumulative (1) të ndërtojë prima facie rastin, (2) të dëshmojë se ekzekutimi i vendimit i shkakton dëm të pariparueshëm dhe (3) të dëshmojë se masa e përkohshme është në interesin publik.
Marrë parasysh që presidenti si palë në procedurë nuk e ka plotësuar asnjërin nga të tri kushtet të cilat kërkohet të plotësohen në mënyrë që Gjykata të aprovojë kërkesën për masën e përkohshme, ne kemi kërkuar nga Gjykata Kushtetuese ta refuzojë kërkesën në lidhje me vendosjen e masave të përkohshme.
Si kryeministër i Republikës së Kosovës, nuk kam përgjegjësi më të lartë dhe më të rëndësishme sesa mbrojtja e shëndetit të të gjithë qytetarëve të vendit. Prandaj unë, bashkë me të gjithë Qeverinë time, jemi zotuar se do të veprojmë në përputhje të plotë me rekomandimet e ekspertëve të IKShP-së dhe, në veçanti, të drejtorit të tij, prof. Dr. Naser Ramadani. Lufta e presidentit kundër këtyre rekomandimeve ka ardhur në kohën më të papërshtatshme të mundshme.
Sipas ekspertëve të IKShP-së, po hyjmë në dy javët më kritike, kur rreziku për përhapjen e përshpejtuar të virusit është në nivelin më të lartë. Kam thënë dhe do ta përsëris edhe një herë: Nuk ka vend për panik. Mirëpo, në javët që vijnë, më shumë se kurrë, duhet secili prej nesh, institucionet edhe qytetarët, të veprojë me kujdes të shtuar, në mbrojtje të të gjithëve.
Në kohë amullie si kjo është me rëndësi jetike që të mos harrojmë se të gjithë duhet të jemi duke luftuar armikun e njëjtë e që është Virusi COVID-19.
Ne do të vazhdojmë me punën tonë në raport me menaxhimin sa më të mirë të kësaj situate, pavarësisht veprimeve të presidentit, derisa të sigurohemi që do të dalim shëndetshëm e sigurt prej saj. Mos lejoni t’ju ndikojnë apetitet politike, por rrini nëpër shtëpitë e juaja, lani duart dhe bëni kujdes me distancën.
ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore.
NUIS/NIPT K01711004FKontaktTelefono
18:40 | 30/03/2020
