Loading ...
Në ceremoninë përmbyllëse të garës ndërkombëtare për projektin Parku i Besimit (Faith Park) në Tiranë, është shpallur fituese studioja ndërkombëtare BIG – Bjarke Ingels Group, mes 12 finalistëve nga vende të ndryshme si Mbretëria e Bashkuar, Portugalia, Danimarka, Gjermania, Spanja, Meksika, Belgjika, Holanda dhe Italia.
Parku i Besimit do të ndërtohet mbi idenë e bashkëjetesës dhe dialogut ndërfetar, duke u frymëzuar nga elementët simbolikë të përbashkët të feve të mëdha, të shprehur përmes pemëve, frutave dhe luleve të përmendura në shkrimet e shenjta. Ky projekt do të shërbejë si një pikë takimi për reflektim, qetësi dhe ndërveprim kulturor, duke i dhënë qytetit të Tiranës një dimension të ri shpirtëror dhe estetik.
I pranishëm në këtë aktivitet ishte edhe kryeministri Edi Rama, i cili gjatë fjalës së tij falënderoi pjesëmarrësit në këtë konkurs.
“Dua të falënderoj të gjithë ata që morën pjesë në këtë konkurs. Ishte një konkurs që gjeti pasqyrim në të gjitha përpjekjet e pjesëmarrësve. Ishte një kohë nga e cila mësuam shumë të gjithë dhe e them me mjaft përulësi një gjë të tillë. Doja të merrja edhe mendimet e disave prej jush që nuk ishin pjesë e konkursit dhe as e jurisë. Njëri duhet të fitonte, jemi mjaft të bindur për fituesin, por në të njëjtën kohë do të doja të bënim më shumë parqe në këtë mënyrë. Ajo që na keni sjellë është e jashtëzakonshme. Faleminderit të gjitha ekipeve që morën pjesë… një energji e shkëlqyer dhe një moment i jashtëzakonshëm arktitekturë dhe krijimi të peizazhit për natyrën”, tha Rama.
