Këtë të martë u publikua lajmi se Gjykata e Barcelonës pranoi të lirojë futbollistin brazilian Dani Alves me garancinë pasurore prej një milion eurosh, ndërsa është regjistruar apelimi ndaj dënimit të tij me 4 vite e gjysmë burg nga shkalla e parë për përdhunimin e një të reje në një klub nate.
Në këtë mënyrë, braziliani do të mund të largohet nga burgu “Brians 2”, ku është i burgosur që prej 20 janarit 2023, sapo të depozitojë një milion euro dhe të dorëzojë dy pasaportat (braziliane dhe spanjolle).
Për ta bërë këtë, njerëzit e ish-mbrojtësit të Barcelonës janë mbështetur te Neymar, ish-bashkëlojtari i tij te Blaugranët, PSG dhe kombëtarja braziliane.
Sipas “La Vanguardia”, babai i Neymarit do të jetë ai që do të paguajë shumën e lirimit me kusht të Dani Alves.
Këtë e kanë konfirmuar për gazetën katalanas burime pranë ish-futbollistit.
Neymar ka qenë mik i Dani Alves që kur u takuan në Barcelonë dhe, nëpërmjet babait të tij do të paguajë garancinë prej një milion eurosh, pasi Alves i ka të ngrira llogaritë.
Dani Alves tashmë i është drejtuar Neymarit dhe babait të tij për të paguar 150 mijë eurot që gjykata hetuese kërkoi për dëmshpërblimin e viktimës së sulmit seksual dhe që shërbeu si rrethanë lehtësuese për uljen e dënimit në 4 vite e gjysmë.
Babai i Neymar ishte përgjegjës për transferimin e parave për ta ndihmuar palën mbrojtëse të Dani Alves./h.ll/abcnews.al
