Instagram po dështon të ndërmarrë veprime kur identitetet e njerëzve vidhen në platformë, ka thënë një shkrimtar që kishte një llogari false të krijuar në emrin e tij. Joe Dunthorne tha se ai “fjalë për fjalë nuk mund të kontaktonte” kompaninë për të raportuar llogarinë e rreme. Një ekspert i kërcënimeve kibernetike i kërkoi Instagramit dhe platformave të tjera të mediave sociale të bëjnë më shumë për t’iu përgjigjur llogarive të rreme.
Instagram tha se bëri “më të mirën për të parandaluar që përdoruesit të bëhen viktima të imitimit”. Një zëdhënëse e Meta që është kompania mëmë e Instagramit, shtoi: “Siguria e komunitetit tonë është e rëndësishme për ne dhe është kundër rregullave tona që llogaritë të imitojnë dikë tjetër”. “Ne bëjmë çmos për të parandaluar që përdoruesit të bëhen viktima të imitimit dhe postimet në fjalë janë hequr nga profili”.
Dunthorne, i lindur në Swansea, romani debutues i të cilit “Nëndetësja” u bë film në vitin 2010, tha se fillimisht ishte sinjalizuar për llogarinë në Twitter. Ai zbuloi se një llogari ishte krijuar në emrin e tij, duke hequr postimet e tij nga Twitter dhe duke i postuar ato në Instagram raporton “BBC”. Ai tha: “Ishte drithëruese dhe shqetësuese, por edhe më e çuditshme ishte se ata kishin mjaft ndjekës pothuajse 6,000. Ju keni mbetur duke menduar pse unë?”
Ai i’u bashkua Instagramit, kontaktoi llogarinë dhe u kërkoi atyre të ndalonin, por tha se llogaria e bllokoi atë. Miqtë e tij filluan të dërgojnë mesazhe në llogarinë false dhe të komentojnë postimet, por as kjo nuk ndihmoi: “Unë mendoj se ai i raportoi ato mesazhe si abuzive dhe ato u hoqën brenda ndoshta katër ose pesë minutave pasi njerëzit të postonin, të gjithë do të zhdukeshin nga llogaria e tij”. “Më dukej autentikisht si llogaria ime në Instagram, por nuk mund të bëja asgjë për ta ndaluar këtë”. Ai vendosi të krijojë vetë një llogari false nën maskën e një poeteje të quajtur Joanna me një foto të horizontit të Nju Jorkut dhe kontaktoi llogarinë duke thënë se ishte një fans i madh. “Mesazhet e para që më dërguan ishin vërtet shqetësuese,” tha ai.
“A jeni beqare? dhe a doni të bisedoni në WhatsApp?… gjëra që kishin një lloj këndvështrimi seksual dhe kjo ishte vërtet e frikshme”. Llogaria e rreme e Dunthorne kishte zgjuar interesin e mashtruesit të tij, atij i’u dërgua një numër telefoni, duke e shtyrë atë të merrte një kartë të re SIM dhe të fillonte të kontaktonte personin në WhatsApp. Por më pas një ditë, teksa po lante vogëlushin e tij, ai mori një telefonatë video WhatsApp nga numri.
“Nuk e dija a të përgjigjesha, padyshim që po shtiresha si dikush tjetër, e dija që po shtireshin si dikush,” tha ai. “U përgjigja në telefon dhe e mbaja larg nga fytyra ime, ata e kishin fikur kamerën, kështu që asnjëri prej nesh nuk i tregoi fytyrën njëri-tjetrit”. “Kemi kaluar rreth 20 sekonda duke dëgjuar njëri-tjetrin përpara se të më mbyllnin telefonin dhe të më bllokonin”.
Ai tha se pas disa muajsh nga krijimi i llogarisë së rreme dhe “duke dështuar të hiqte llogarinë ose ndonjë veprim të merrej nga Instagrami”, llogaria filloi të përdorte personazhin e tij për të bindur njerëzit të blinin kriptomonedhë nga miku i tij “Tyler”, ajo që Dunthorne besonte që ishte një tjetër llogari e rreme, përsëri duke imituar një person të vërtetë, këtë herë një analist kripto. Ai tha se vazhdoi të përpiqej të kontaktonte me Instagramin pa dobi: “Unë fjalë për fjalë nuk mund t’i kontaktoja.
“Ata kanë një formular në internet, jam i sigurt se marrin dhjetëra mijëra kërkesa në ditë dhe kam dërguar disa mesazhe të ndryshme përmes atij sistemi dhe nuk më kthyen përgjigje për kërkesat e mia”. Profesoresha Sara Giro Corrie, për kërcënimet kibernetike në Universitetin Swansea, tha se platformat duhet të marrin më shumë përgjegjësi për llogaritë e rreme. “Unë imagjinoj se vëllimi i gjërave që raportohen duhet të jetë i jashtëzakonshëm për platforma si Instagram, por kjo nuk është justifikim sepse nëse kompanitë drejtojnë platforma kaq të mëdha, atëherë ato duhet të marrin përgjegjësi dhe të gjejnë mënyra për të vepruar shumë më shpejt kur gjërat raportohen” tha ajo. / abcnews.al
