Një studim i shkencëtarëve amerikanë dhe polakë, në të cilin u analizuan më shumë se 226,000 njerëz në mbarë botën, tregoi se 4000 hapa në ditë janë të mjaftueshme për të filluar reduktimin e rrezikut të vdekjes së parakohshme për çfarëdo arsye, raportoi BBC.
Mjaftojnë pak më shumë se 2300 hapa në ditë për një zemër dhe enë gjaku të shëndetshme, duke theksuar se sa më aktivë të jenë njerëzit, aq më shumë kontribuojnë në shëndetin e tyre.
Studimi tregon gjithashtu se çdo 1,000 hapa shtesë mbi 4,000 zvogëlon rrezikun e vdekjes së parakohshme me 15 për qind deri në 20,000 hapa.
Një ekip nga Universiteti Mjekësor i Łódź në Poloni dhe Shkolla e Mjekësisë e Universitetit Johns Hopkins në SHBA zbuluan se ecja ka një efekt të dobishëm te njerëzit, pavarësisht nga gjinia, mosha apo vendi ku ata jetojnë.
Megjithatë, përfitimet më të mëdha shëndetësore u panë tek ata nën moshën 60 vjeç.
Shkencëtarët kanë vënë në dukje se jo vetëm ilaçet mund të kontribuojnë në shëndetin, por se ushqimi dhe ushtrimet janë njësoj, ose edhe më shumë, efektive në uljen e rrezikut të sëmundjeve kardiovaskulare dhe zgjatjen e jetës.
Sipas Organizatës Botërore të Shëndetësisë, aktiviteti fizik i pamjaftueshëm është përgjegjës për vdekjen e 3.2 milionë njerëzve çdo vit, që është shkaku i katërt më i zakonshëm në botë./abcnews.al
