Gjilani ka nisur me rinovimet dhe nga lojtarët e marrë nga Superiorja ka konfirmuar zyrtarisht se Enea Koliçi është pjesë e rëndësishme e ekipit edhe për të ardhmen. Portieri ka spikatur në sezonin e parë në Kosovë dhe Gjilani ka nxituar të nënshkruajë kontratën e re dhe klubi dardan ka dalë edhe me njoftim.
“Sport Club Gjilani njofton se ka arritur të zgjasë marrëveshjen e bashkëpunimit me Enea Koliçin edhe për dy edicione të radhës. Klubi falënderon Enean për besimin dhe i uron sukses drejt realizimit të objektivave që janë vendosur”, njofton klubi i Gjilanit.
Ndërkohë ditën e djeshme një tjetër titullar dhe një nga më të rëndësishmit e Gjilanit rinovoi deri në fund të sezonit të ardhshëm. Gerhard Progni, autor i 9 golave dhe 3 asisteve ka vendosur të zgjasë aventurën me skuadrën e Ismet Munishit.
Gjatë kësaj periudhe ka pasur edhe largime. Ivan Fustar e Darko Nikac u larguan të parët, ndërkohë që të njëjtën gjë kanë bërë edhe Ardit Hila e Arbër Cyrbja. /abcnews.al
