Të paktën tre punëtorë u vranë pasi një skelë u shemb në një kantier të madh ndërtimi në qytetin portual gjerman të Hamburgut, tha sot një zëdhënës i shërbimit zjarrfikës.
“Ne aktualisht mund të konfirmojmë tre vdekje,” tha për AFP një zëdhënës i shërbimit lokal të zjarrfikësve. Zjarrfikësit fillimisht raportuan pesë të vdekur.
“Një person raportohet si i zhdukur për momentin, ndoshta është ende nën rrënoja”, shtoi zëdhënësi. Autoritetet kishin folur më parë për “shumë njerëz të zhdukur”.
Punëtorët që vdiqën po ndërtonin një kabinë ashensori 8 katëshe kur skela u shemb rreth orës 09:00 të mëngjesit, sipas Bild.
Rreth 70 anëtarë të ekipeve të shpëtimit ndodhen në vendngjarje. Aksidenti, shkaqet e të cilit mbeten të panjohura, ndodhi në Havencity, një kantier i madh ndërtimi që rizhvillon një pjesë të vjetër të portit të Hamburgut.
Sipas Bild, skela është shembur në Westfield Hamburg-Überseequartier, një kompleks i ri tregtar, banimi dhe argëtimi që pritet të përfundojë në pranverën e 2024. Kompleksi do të përfshijë gjithashtu një terminal të ri anijesh lundrimi. Pronari i saj, kompania shumëkombëshe Unibail-Rodamco-Westfield, foli për një “aksident tragjik”.
Kompania, e specializuar në menaxhimin, promovimin dhe investimin në qendra të mëdha tregtare, shpreh “mbështetjen e saj për forcat e shpëtimit dhe po punon me autoritetet”, thuhet në një deklaratë. “Shpëtimi po rezulton të jetë shumë i vështirë”, tha një zëdhënës i zjarrfikësve për gazetën Hamburger Morgenpost, duke përmendur elementët kompleksë të skelave që e bëjnë ndërhyrjen të rrezikshme për shpëtimtarët.
Vendi i ndërtimit, ku punojnë gjithsej rreth 700 punëtorë, u evakuua, sipas Bild. Policia ka rrethuar vendin e aksidentit dhe në vendngjarje ka mbërritur një helikopter shpëtimi dhe disa autoambulanca për të transportuar të plagosurit. /abcnews.al
