TIRANË- I riu që goditi me grusht ish-kryeministrin Sali Berisha dhjetorin e kaluar është person me problem mendore. Në këtë përfundim kanë dalë 4 ekspertët e mjekësisë ligjore dhe materiali është depozituar në prokurorinë e Tiranës.
Për këtë hetuesit i kanë kërkuar gjykatës që të pushojë hetimet dhe të vendosë shtrim të detyruar spitalor për Shehun. 31-vjeçari mbahet i izoluar në ambientet e burgut 313 në kryeqytet prej dhjetorit të kaluar.
Ende nuk është caktuar një datë se kur do të shqyrtohet kërkesa e prokurorisë nga gjykata, ndërsa akuzat e goditjes për shkak të detyrës dhe plagosjes me dashje pritet të rrëzohen për shkak se Shehu nuk mund të ndiqet më penalisht.
Ngjarja ndodhi më 6 dhjetor të vitit të kaluar kur shehu qëlloi me grusht në fytyrë ish-kryeministrin Berisha gjatë një proteste të thirrur nga opozita.
31-vjeçari arriti të kalonte perimetrin e sigurisë dhe të godiste me grusht Berishën. Kjo nuk është hera e parë që Shehu përballet me drejtësinë.
Ai rezulton person me precedentë të mëparshëm penalë, pasi fillimisht është arrestuar me një sasi kanabis, ndërsa në vitin 2017, është gjobitur për rrahjen e një personi./abcnews.al
