Që nga rizgjedhja e Donald Trumpit, në mediat sociale kanë qarkulluar pretendimet se SHBA-ja do të largohet nga NATO nëse nuk arrin të mbështesë Ukrainën kundër pushtimit rus.
Një pretendim në platformën sociale Thread thotë se Sekretari i Përgjithshëm i NATO-s, Mark Rutte, ka kërcënuar me përjashtim të SHBA-së nga aleanca nëse presidenti i sapozgjedhur Donald Trump “ia dorëzon Ukrainën presidentit rus Vladimir Putin”, transmeton Telegrafi.
Frika se një fitore e Trump në zgjedhjet presidenciale të nëntorit në SHBA mund të çojë në uljen e mbështetjes për Ukrainën – apo edhe dorëzimin ndaj pushtimit rus – ka qenë prej kohësh një shqetësim për NATO-n dhe kontinentin më të gjerë evropian.
Gjatë gjithë fushatës së tij dhe madje edhe më parë, Trump ishte kritik i zëshëm i mbështetjes që SHBA po i dërgonte Kievit dhe vazhdimisht pretendon se mund t’i jepte fund shpejt luftës sapo të jetë në detyrë, gjë që shumë e kanë interpretuar se ai po i bën presion Ukrainës që të heqë dorë nga territori që Rusa ka pushtuar në këmbim të paqes.
Megjithatë, Trump nuk është akoma në pushtet, kështu që situata aktuale nuk ka ndryshuar dhe nuk ka asnjë provë që Rutte të ketë thënë ndonjë gjë lidhur me dëbimin e SHBA-së nga NATO edhe nëse Trump vendos të reduktojë mbështetjen.
Në një samit të Komunitetit Politik Evropian (EPC) në Budapest të mbajtur në nëntor, Rutte në fakt e vlerësoi Trumpin për lëvizjen e NATO-s drejt shpenzimeve më të larta të mbrojtjes.
“Kur ishte president ishte ai në NATO që na stimuloi të kalonim mbi 2 për qind dhe tani edhe falë tij, në NATO, nëse i hiqni për një moment numrat e SHBA-së, është mbi 2 për qind dhe mendoj se kjo është puna e tij, suksesi i tij dhe ne duhet të bëjmë më shumë”, u tha Rutte gazetarëve.
Vetë NATO ka mohuar që Rutte të ketë kërcënuar ndonjëherë se do të dëbojë SHBA-në. Një zëdhënës i tha EuroVerify se ishte një pretendim “i rremë”.
