Sekretari amerikan i Mbrojtjes Lloyd Austin shprehu shqetësimin e tij për hezitimin e Pekinit për t’u përfshirë në dialog me Uashingtonin për menaxhimin e krizave, duke theksuar se dialogu është vendimtar për të shmangur konfliktet.
Duke folur në konferencën kryesore të sigurisë aziatike të njohur si Dialogu Shangri-La, Austin tha se kanalet e hapura të komunikimit midis udhëheqjes së ministrive të mbrojtjes të SHBA-së dhe Kinës ishin “thelbësore” dhe do të parandalonin çdo gjykim të gabuar që mund të çonte në konflikt.
Në të njëjtën kohë, me rastin e situatës në Tajvan, ai tha se Uashingtoni nuk do të tolerojë asnjë provokim të aleatëve dhe partnerëve të tij nga Kina, duke siguruar Pekinin se SHBA-të mbeten të përkushtuara për ruajtjen e status quo-së në Tajvan dhe do të preferonte dialogun nga konflikti.
Austin përmendi pushtimin rus të Ukrainës për të theksuar se sa e rrezikshme do të bëhej bota nëse fuqitë e mëdha do të pushtonin fqinjët e tyre paqësorë pa u ndëshkuar.
“Konflikti nuk është as i afërt dhe as i pashmangshëm. Parandalimi është i fortë sot dhe është detyra jonë që të jetë kështu”, tha Lloyd Austin.
Ministri i Mbrojtjes i Kinës Li Sangfu refuzoi pak ditë më parë një ftesë për t’u takuar me homologun e tij amerikan në margjinat e konferencës në Singapor.
/abcnews.al
