Loading ...
Departamenti i Transportit i Shteteve të Bashkuara ka paralajmëruar se mund t’i ndërpresë 73 milionë dollarë financim shtetit të Nju Jorkut, pas zbulimeve se licenca komerciale të drejtimit të kamionëve janë lëshuar në mënyrë të parregullt për persona që nuk janë shtetas amerikanë. Paralajmërimi vjen si pjesë e tensioneve të vazhdueshme midis administratës Trump dhe shteteve të drejtuara nga demokratët.
Sipas Departamentit të Transportit, autoritetet e Nju Jorkut kanë 30 ditë kohë për të marrë masa korrigjuese, pas një auditimi federal që ngriti shqetësime serioze mbi procedurat e verifikimit të drejtuesve të mjeteve komerciale. Nëse shteti nuk reagon brenda afatit të vendosur, ai rrezikon humbjen e fondeve federale për autostradat.
Zyrtarët federalë argumentojnë se licencat e lëshuara në shkelje të rregullave të sigurisë mund të paraqesin rrezik për sigurinë publike, ndërsa autoritetet e Nju Jorkut ende nuk kanë komentuar mbi kërcënimin. Ky është episodi më i fundit i përplasjes midis administratës Trump dhe shteteve demokrate mbi çështjet e imigracionit dhe sigurisë rrugore. / abcnews.al /
