Shtetet e Bashkuara festojnë ditën e pavarësisë, me një festë të konsideruar nga presidenti Donald Trump si më e madhja në historinë e vendit. Por nga kampi demokrat nuk kanë munguar kritikat dhe akuzat se presidenti po e përdor festën kombëtare për qëllime politike.
Shtetet e Bashkuara festojnë të enjten ditën e Pavarësisë, e shoqëruar me një paradë të vogël tankesh dhe avionësh që fluturojnë në qiejtë e Uashingtonit dhe fishekzjarrë. Gjithçka është organizuar nga administrata e presidentit Donald Trump, i frymëzuar nga parada ushtarake e mbajtur ditën e pavarësisë në Francë, ku pak vite më parë ishte i pranishëm.
Vetë kreu i shtetit hodhi poshtë më herët shqetësimet e ngritura për shpenzimet e mjeteve ushtarake, që do të parakalojnë pranë memorialit Linkoln, simbol i unitetit kombëtar. Uashingtoni është mbushur me simpatizantë të Trump, që mbajnë veshur kapelet me shkrimin “Mejk Amerika Grejt Wgein”, por edhe me kundërshtarë të tij, që kanë sjellë balonën “Bejbi Tramp” dhe një baner me shkrimin “tradhtar”.
Nga ana e tyre, kritikët e presidentit e kanë quajtur organizimin e administratës së tij një përpjekje për të politizuar një festë të rëndësishme kombëtare. Ata e akuzojnë presidentin për inskenimin e një fushate elektorale të papërshtatshme, bazuar në fjalimin e tij. Dhe në fakt, Trump është i njohur për ndryshimin e rrjedhës së fjalimeve të tij, të cilave u ka dhënë tone politike dhe fyese edhe në ato raste kur eventi nuk ka qenë i tillë. “Njerëzit po mblidhen nga të gjitha anët për t’u bashkuar me ne sot, për atë që do të jetë festa më e madhe në historinë e vendit tonë”, tha Trump në Twitter më herët gjatë ditës./ABC News Albania 24/7
