Shtetet e Bashkuara do të dërgojnë avionë luftarakë F-35 dhe F-16 si dhe një tjetër anije luftarake në Lindjen e Mesme, për të garantuar sigurinë në Gjirin Persik. Në maj, Shtëpia e Bardhë njoftoi se administrata e presidentit Joe Biden do të ndërmerrte një sërë veprimesh por nuk specifikoi se çfarë do të përfshinin ato.
“Pentagoni po rrit praninë dhe aftësitë tona në zonën ngushticën e Hormuzit dhe ujërat përreth”, tha zëdhënësja e Departamentit të Mbrojtjes Sabrina Singh në një konferencë për shtyp.
Aktualisht është e paqartë se ku do të vendosen saktësisht avionët luftarakë dhe për sa kohë do të qëndrojnë në zonë. Në fillim të këtij muaji, Marina e SHBA-së tha se kishte ndërhyrë për të parandaluar Iranin të kapte dy cisterna nafte në Gjirin e Omanit.
Ka pasur sulme ndaj anijeve në Gjirin Persik që nga viti 2019, në kohë tensionesh mes SHBA-së dhe Iranit. Një e pesta e prodhimit botëror të naftës bruto dhe produkteve të naftës kalon përmes ngushticës së Hormuzit.
/abcnews.al
