Fatkeqësia e Çernobilit ka lënë një boshllëk të madh dhe Rusia duhet të parandalohet nga përdorimi i energjisë bërthamore për të shantazhuar botën, tha të mërkurën Presidenti i Ukrainës Volodymyr Zelensky në 37 vjetorin e fatkeqësisë më të keqe bërthamore në histori.
“Ne duhet të bëjmë gjithçka për të parandaluar që shteti terrorist të përdorë objektet e energjisë bërthamore për të shantazhuar Ukrainën dhe botën”, shkroi Zelensky në Twitter.
Ministri i Mbrojtjes i Ukrainës Oleksii Reznikov tha se “heshtja dhe gënjeshtrat e regjimit totalitar sovjetik për tragjedinë çuan në pasoja të tmerrshme që shkuan shumë përtej kufijve të Ukrainës moderne”.
“Sot, sulmet barbare të Rusisë pranë objekteve bërthamore të Ukrainës, okupimi i centralit bërthamor të Zaporizhzhia dhe shndërrimi i tij në një bazë ushtarake e vendosin botën në rrezik të një fatkeqësie të re, shkalla e së cilës mund të tejkalojë Çernobilin,” shtoi ai.
Forcat ruse vazhdojnë të kontrollojnë termocentralin bërthamor të Zaporizhzhia, i cili është termocentrali më i madh bërthamor në Europë.
Termocentrali është shkëputur shpesh nga rrjeti elektrik i Ukrainës për shkak të bombardimeve intensive ruse në zonë, duke rritur frikën në të gjithë Europën për një incident bërthamor.
Rafael Grossi, drejtor i përgjithshëm i Agjencisë Ndërkombëtare të Energjisë Atomike [IAEA], tha të mërkurën se ai foli me Zelensky për të shënuar përvjetorin, duke shtuar se organizata vazhdon përpjekjet e saj për të mbrojtur centralin.
/abcnews.al
