Kina shprehu sot kënaqësinë për vizitën e ardhshme të një delegacioni amerikan, duke shprehur shpresën se kjo do të përmirësojë marrëdhëniet midis vendeve.
Dy ekonomitë më të mëdha në botë, të cilat janë në mosmarrëveshje për një sërë çështjesh, kanë rifilluar dialogun muajt e fundit me një sërë vizitash në Pekin nga zyrtarë të lartë amerikanë, duke përfshirë atë të Sekretarit të Shtetit të SHBA Anthony Blinken në qershor.
Në këtë kontekst, kreu i shumicës demokrate në Senat, Chuck Schumer dhe disa senatorë të tjerë amerikanë pritet të vizitojnë Kinën.
“Shpresojmë se kjo vizitë do t’i lejojë Kongresit Amerikan të kuptojë objektivisht Kinën”, tha Ministria e Jashtme kineze në një deklaratë, e cila nuk specifikoi datën apo numrin e atyre që do të përbëjnë delegacionin që do të vizitojë Kinën.
Sipas agjencisë Bloomberg, Chuck Schumer do të shoqërohet nga kolegu i tij republikan, senatori Mike Crapo.
Delegacioni prej gjashtë anëtarësh shpreson të takohet me presidentin kinez Xi Jinping, sipas mediave amerikane. Sipas gazetës amerikane Neë York Times, delegacioni pritet të vizitojë edhe Korenë e Jugut dhe Japoninë.
Në maj, senatorët amerikanë, përfshirë Chuck Schumer, njoftuan një plan për të luftuar ndikimin në rritje të Kinës në botë. Kjo iniciativë parashikon kufizimin e flukseve të investimeve dhe këtyre teknologjive të fundit në Kinë dhe parandalimin e Pekinit që të nisë çdo sulm ndaj Tajvanit.
Kina pretendon si provincë ishullin prej 23 milionë banorësh, i cili është ndër prodhuesit më të mëdhenj në botë të çipave.
/abcnews.al
