Loading ...FIER- Gjykata e Shkallës së Parë të Rrethit Gjyqësor Fier ka pranuar kërkesën për lirim me kusht të ish-deputetit të Partisë Demokratike Ervin Salianji.
Gjyqtari Noel Veizaj pranoi kërkesën, ndërsa me herët në seancë edhe prokurori Genci Mane dha dakordësinë për lirim me kusht të ish-deputetit demokrat.
Pasi la ambientet e Gjykatës së Fierit, Salianji pohoi për mediat se pasdite do mbajë konferencë në selinë e Partisë Demokratike.
“Do jem në konferencë në orën 17:00 në PD”, tha ai.
Në seancën e kaluar raporti i vlerësimit nga IEVP në Fier, rezultoi pozitiv, sipas avokatit mbrojtës Ledio Brahio.
Salianji ka deklaruar se është viktimë e një procesi të montuar politik dhe se është dënuar politikisht.
Ai është shpallur fajtor për kallëzim të rremë në lidhje me denoncimin e çështjes “Babale”.
Salianji përfundoi në qeli në tetor të 2024 pas vendimit të Gjykatës së Apelit në 26 shtator, e cila la në fuqi vendimin me 1 vit burg.
Në këto kushte janë përmbushur dy të tretat e dënimit dhe për këtë arsye ish-deputeti kërkoi lirim me kusht, kërkesë kjo, e cila u pranua nga gjykata.
