Sadio Mane dhe Jurgen Klopp kanë një lidhje të veçantë mes tyre. Sulmuesi afrikan s’e ka mohuar kurrë vlerësimin për trajnerin gjerman dhe rritjen e madhe që i ka ndodhur nën drejtimin e Klopp. Edhe ky i fundit nuk përton kurrë të flasë me superlativa për lojtarin ofensiv.
Një marrëdhënie fantastike, por sinqeriteti i Jurgen Klopp gjatë muajit dhjetor nuk i ka pëlqyer 28-vjeçarit, emri i të cilit lidhet me një transferim te Real Madrid. France Football zbulon prapaskenat dhe mërzitja lidhet me “Topin e Artë”. Trajneri i Liverpool zgjodhi Virgil Van Dijk, mbrojtësin që zhvilloi një sezon të jashtëzakonshëm.
“Kam respekt të jashtëzakonshëm për Leo Messin, por Topi i Artë këtë sezon duhej të shkonte për një lojtar të Liverpoolit. E kam thënë gjithmonë që Messi është futbollisti më i mirë që kam parë ndonjëherë të luajë, por referuar sezonit të fundit, Van Dijk ka qenë fantastik dhe e meritonte të fitonte Topin e Artë”, u shpreh Klopp.
Deklaratë që nuk është pritur aspak mirë nga Sadio Mane (u rendit i katërti) dhe Momo Salah (u rendit në vend të pestë). Ylli argjentinas i Barcelonës fitoi këtë çmim për herë të gjashtë dhe mbrojtësi holandez i Liverpool u rendit i dyti, me CR7 që kompletoi podin. Mane është ndjerë i tradhëtuar nga trajneri i tij dhe po mendon seriozisht largimin drejt “Los Blancos”. /abcnews.al
