Një vend i udhëhequr nga një kriminel i akuzuar për krime lufte është në krye të Këshillit të Sigurimit të Kombeve të Bashkuara, pasi tani është radha e Rusisë të marrë presidencën e organit më të fuqishëm që merret me ruajtjen e paqes dhe sigurisë globale.
Kështu e ka përshkruar ministri i Jashtëm i Ukrainës, Dmytro Kuleba marrjen e presidencës së Këshillit nga Rusia më 1 prill, duke thënë se kjo është “shakaja më e keqe” e 1 prillit në botë.
“Vendi që shkel në mënyrë sistematike të gjitha rregullat themelore të sigurisë ndërkombëtare po kryeson një organ, misioni i vetëm i të cilit është të ruajë dhe mbrojë sigurinë ndërkombëtare”, tha Kuleba.
Presidenca e Këshillit të Sigurimit rrotullohet sipas alfabetit midis 15 vendeve anëtare. Trupi kontrollohet nga pesë anëtarët e tij të përhershëm, duke përfshirë SHBA-në dhe Rusinë.
Trupi diplomatik i OKB-së është i vetëdijshëm për skepticizmin publik për Rusinë që drejton këshillin ndërsa vazhdon lufta në Ukrainë, një vend anëtar i OKB-së.
Një president i Këshillit të Sigurimit supozohet të qëndrojë neutral. Por në rolin e saj të ri, Rusia mund të bëjë të kundërtën.
/abcnews.al
