Zyrtarët rusë kërcënuan Perëndimin të dielën me një përgjigje “të ashpër” në rast se asetet e ngrira ruse konfiskohen, duke premtuar beteja ligjore “të pafundme” dhe masa të rrepta, raporton agjencia “Reuters”.
“Atdheu ynë nuk është në shitje”, shkroi Zakharova në aplikacionin e mesazheve Telegram. “Një pasuri ruse duhet të mbetet e paprekur, sepse përndryshe do të ketë një përgjigje të ashpër ndaj vjedhjes perëndimore. Shumë në Perëndim e kanë kuptuar tashmë këtë. Fatkeqësisht, jo të gjithë”.
Në përgjigje të luftës së Rusisë në Ukrainë, Shtetet e Bashkuara dhe aleatët ndaluan transaksionet me Bankën Qendrore të Rusisë dhe Ministrinë e Financave dhe bllokuan rreth 300 miliardë dollarë asete sovrane ruse në Perëndim, shumica e të cilave janë në institucionet financiare evropiane dhe jo amerikane.
Zëdhënësi i Kremlinit Dmitry Peskov, ka theksuar në një koment të veçantë se kishte ende shumë para perëndimore në Rusi të cilat mund të shënjestroheshin nga kundërmasat e Moskës.
“Perspektivat për sfida ligjore (kundër konfiskimit të aseteve ruse) do të jenë të hapura”, tha ai. “Rusia do të përfitojë prej tyre dhe do të mbrojë pafundësisht interesat e saj”, ka thënë Peskov.
