Loading ...Niveli i ujit në Kaskadën e Drinit ka vijuar të rritet me shpejtësi për shkak të reshjeve të dendura të shiut. Për të mbajtur nën kontroll prurjet aktualisht shkarkimet e kontrolluara nga hidrocentrali i Komani kanë arritur në 1200 metër kub në sekondë ndërsa në hidrocentralin e Vaut të Dejës po shkarkohet një sasi prej 1600 m³/sekondë.
Korporata elektro-energjetike Shqiptare thekson se prurjet kanë arritur në 3850 metër kub në sekondë ndërsa reshjet e shiut parashikohen të jenë prezente për disa ditë, gjë që nënkupton se sasia e prurjeve të ujit në Kaskadë do të jetë maksimale.
Por përtej përmbytjeve reshjet e shiut kanë përmirësuar ndjeshëm situatën energjetike në vend.
Në liqenin e Fierzës niveli i ujit është rritur me gati 5 metra vetëm në 24 orë duke arritur në 285 metra. Ndërsa në hidrocentralin e Komanit niveli i ujit është 174 .13 metra dhe në atë të VAut të Dejës 75 metra.
Aktualisht prodhimi ditor i energjisë elektrike rezulton se ka arritur në 12,130 Mwh.
Korporata Elektroenergjetike Shqiptare vijon të monitorojë me kujdes dhe në mënyrë të vazhdueshme situatën hidrike në Kaskadë, duke garantuar menaxhim të sigurt dhe efikas të burimeve ujore.
