Nga Erblina Mile
Në arkën e shtetit shqiptar për 9 muaj janë mbledhur 36 miliard lekë më pak ose rreth 300 milion euro nëse e krahasojmë me të njëjtën periudhë të një viti më parë. Mosrealizimi kryesor rezulton në tatime e dogana me rreth 249 milion euro.
Azmi Stringa ekspert i financave deklaron se këto të dhëna pasqyrojnë faktin se ekonomia shqiptare është goditur më shumë se parashikimet e bëra
“Kriza ka rënduar më shumë seç pritej ekonominë, kjo përkthehet në tregues fiskal, sidomos në mbledhjen e të ardhurave. Ne jemi më keq se një vit më parë, por jemi edhe më keq se në krahasim me buxhetin e rishikuar në korrik të 2020, pra në krahasim më parashikimet në po mbledhim më pak të ardhura”, u shpreh ai.
Por edhe më shumë e zymtë paraqitet gjendja financiare nëse analizohet niveli i borxhit publik i cili sipas FMN arrin në 83,2%.
Sipas ekspertit Stringa kjo nënkupton ulje të investime dhe të shërbimeve për qytetarët. Dhe një tregues aktual është fakti i zvarritjes së procesit të rindërtimit.
“Një borxh në këto nivele do të thotë që qytetarët të mos marrin shërbimet e merituara, pra në do të ngushtojmë rripin për të mos bërë edhe investimet e nevojshme që qytetarët të jenë konkurrues në të ardhmen. Pra borxhi i lartë na detyroi që të shpenzojmë më pak në vitet në vazhdim që të shpenzojmë më pak si për arsimin, shëndetësinë etj…”, sqaroi ai.
Për të realizuar një shpërndarje më të mirë të fondeve aktuale kërkohet një tjetër rishikim i buxhetit për këtë vit.
Alokimi i fondeve kërkohet sidomos në drejtim të shtresave në nevojë, pasi fondi për ndihmë ekonomike për të papunët rezulton të jetë i njëjtë me një vit më parë.
“Kërkojmë rishikim të menjëhershëm të buxhetit për të alokuar fonde të cilat janë të pamjaftueshme. Fatkeqësisht ky diskutim nuk po ndodh, por duhet bërë patjetër”, tha ai.
Nëse e krahasojmë realizimin e të ardhurave me rishikimin e fundit të buxhetit rezulton se ka pasur një realizim të planit me 90%.
Por pavarësisht kësaj Institucionet Ndërkombëtare Financiare kanë pritshmëri pesimiste për ecurinë ekonomike të Shqipërisë gjatë këtij viti.
Berzh parashikon që ekonomia shqiptare do pësoj tkurrje me 9 % , BB 8.4% dhe FMN me 7,5 por qeveria shqiptare fatkeqësisht nuk e ka ndryshuar parashikimin duke i qëndruar tkurrjes në një nivel prej 5%.
Te ardhurat Janar-Shtator
2019 343,3 MLD
2020 307 ,8 MLD
Rreth 36 miliard më pak.
/abcnews.al/
