49 persona, të cilëve iu refuzua kërkesa për azil, janë riatdhesuar sot nga Franca, mes të cilëve edhe familje me fëmijë.
5 prej personave janë kthyer nga Luksenburgu dhe 44 nga Franca, ndërsa për të realizuar operacionin mori pjesë edhe FRONTEX
Policia e Shtetit ka bërë edhe njëherë thirrje për personat që udhëtojnë në hapësirën SCHENGEN, me qëllim kërkimin e azilit, të mos bëjnë përpjekje të kota, pasi shanset për të fituar azil janë zero.
Njoftimi i policisë:
“Rinas – Operacioni i radhës i riatdhesimit Francë + FRONTEX, me eskortë shqiptare.
Riatdhesohen 49 shtetas, mes tyre familje me fëmijë, të cilëve u është refuzuar azili.
Vijojnë çdo javë operacionet për riatdhesimin e shtetasve shqiptarë të cilëve u është refuzuar kërkesa për azil apo që kanë shkelur rregullat e qëndrimit në hapësirën SCHENGEN.
Nëpërmjet një fluturimi me charter nga Metz, Nancy, kanë mbërritur në Rinas 49 shtetas shqiptarë, mes tyre familje me fëmijë, nga të cilët 5 janë kthyer nga Luksemburgu dhe 44 nga Franca.
Veç bashkëkoordinimit Francë – Belgjikë dhe Francë – Holandë, kësaj radhë kanë marrë pjesë Luksemburgu dhe eskorta e Policisë Kufitare shqiptare.
Policia Kufitare në Rinas mori masa për sigurimin e tyre në ambientet e përcaktuara për këtë qëllim, deri në përfundim të procedurave nga specialistët e Policisë Kufitare.
Ministria e Brendshme dhe Policia e Shtetit apelojnë edhe njëherë për të gjithë ata shtetas që synojnë të udhëtojnë në hapësirën SCHENGEN, me qëllim kërkimin e azilit, të mos bëjnë përpjekje të kota, pasi shanset për të fituar azil janë zero.
Ndërkohë, Policia Kufitare ka shtuar masat gjatë intervistimit, për arsyet e lëvizjes në hapësirën SCHENGEN, si dhe masat në kufirin e gjelbër“./abcnews.al
