Përktheu Sonila Backa-abcnews.al
Në shkurt të vitit të kaluar, ndërsa Presidenti Putin njoftoi pushtimin e tij të Ukrainës në një fjalim televiziv rrëqethës, Kremlini ishte aq i sigurt për suksesin saqë trupat rusë u përgatitën për paradën e fitores në Kiev.
Gati një vit pas luftës, dhjetëra mijëra ushtarë rusë janë vrarë, qindra mijëra burra janë larguar nga vendi për të shmangur rekrutimin, dhe disa zona ruse në kufi me Ukrainën po bombardohen pothuajse çdo ditë. Në dy javët e fundit, forcat ruse kanë pësuar numrin më të lartë të viktimave që nga fillimi i luftës, sipas Ministrisë Britanike të Mbrojtjes.
Në vend të fjalimeve triumfuese në kryeqytetin ukrainas, imazhi i Putinit si gjeneral suprem është shembur, duke e lënë atë ndoshta më të dobët se në çdo periudhë gjatë sundimit të tij 23-vjeçar, raporton abcnews.al.
Dështimi i tij për të siguruar një fitore të shpejtë i kushtoi atij respektin dhe besnikërinë e padiskutueshme të zyrtarëve të lartë, tha Genadi Gudkov, një ish kolonel i KGB-së dhe ish-deputet që jeton jashtë vendit.
Gabimet e Putinit
“Putini nuk mund të sundojë Kremlinin si më parë. Ai ka bërë shumë gabime dhe këtë po e kuptojnë të gjithë, nga shtabi i përgjithshëm i forcave të armatosura, udhëheqja e FSB-së (shërbimi i sigurisë) e deri te ndihmësit e tij të ngushtë”, tha ai.
“Zyrtarët po bëhen më të guximshëm dhe luftimet e brendshme janë përshkallëzuar. Nuk ka më nënshtrim ndaj Putinit që ekzistonte një vit më parë”, tha Gudkov, duke përmendur bisedat me të afërm të figurave të Kremlinit, ndihmës të figurave politike në Moskë dhe manjatë rusë të paidentifikuar.
“Është një rebelim i heshtur kundër tij”.
Tatyana Stanovaya, një analiste politike ruse, kërkimi i së cilës fokusohet në Kremlin, tha se ndërsa ka pak mundësi që zyrtarët të jenë mjaftueshëm të guximshëm për të kritikuar drejtpërdrejt Putinin, shumë janë të tronditur nga trajtimi katastrofik i luftës.
“Shumë prej tyre e respektuan atë,” tha ai. “Jo më”.
Barra mbi ekonominë
Përveç pengesave në fushën e betejës, ekonomia e Rusisë është në kaos gjithashtu nën peshën e sanksioneve perëndimore, duke përfshirë vendosjën e çmimit të kufirit për naftën ruse.
Muajin e kaluar, Rusia regjistroi një deficit buxhetor prej 1.76 trilionë. rubla (rreth 22 miliardë euro), më e madhja për janarin që nga ardhja e Putinit në pushtet në vitin 2000.
Sanksionet gjithashtu i kanë hequr anëtarëve të elitës ruse nga asetet e huaja, duke përfshirë pronat në Europë, ndërsa e bëjnë shumë më të vështirë për fëmijët e tyre të studiojnë nq shkollat dhe universitetet e njohura perëndimore, raporton abcnews.al.
Por Putini mbetet i palëkundur në besimin e tij se ai po përmbush “misionin e tij historik” për të marrë kontrollin e Kievit, tha Fyodor Lukyanov, kreu i Këshillit të Politikës së Jashtme dhe Mbrojtjes së Rusisë, i cili shpesh këshillon Kremlinin.
Këshilli nuk kuptohet se është konsultuar për vendimin për pushtimin e Ukrainës, me vendimet kryesore që janë marrë vetëm nga Putin dhe një grup i vogël i vijës së ashpër.
Pavarësisht pengesave të pësuar nga ushtria e tij, Putin u duk i qetë duke iu përgjigjur pyetjeve në një forum në fund të tetorit, sipas Lukyanov.
“Ai ishte po aq i sigurt dhe i relaksuar si kurrë më parë”, tha ai. “Nuk ishte fare i tensionuar pavarësisht se çfarë pyetjesh ishin bërë. Ai duket se është 200% i sigurt se ajo që ai dhe Rusia po bëjnë është e nevojshme dhe e pashmangshme.
Se ne jemi në anën e duhur të historisë, pavarësisht se çfarë ndodh”.
Lukyanov zbuloi gjithashtu se shumë politikanë rusë ishin të hutuar se pse Kremlini nuk ishte kundërpërgjigjur “siç duhet” kundër furnizimit të Ukrainës me armë perëndimore, raporton abcnews.al.
Putin paralajmëroi në fillim të luftës se vendet perëndimore që u përpoqën të ndihmojnë Ukrainën “do të përballen me pasoja më të mëdha se sa janë përballur në histori”.
Ai gjithashtu ka kërcënuar se do të përdorë armë bërthamore për të mbrojtur territoret e pushtuara në Ukrainë, të cilat Rusia i pretendon si të sajat.
Retorika e përdorimit të armëve bërthamore
Retorika bërthamore e Kremlinit ishte një faktor kyç në vendimin e fundit të një grupi shkencëtarësh ndërkombëtarë për të lëvizur akrepat e Orës së Kiametit, e cila përshkruan kërcënimet ndaj ekzistencës së njerëzimit, në 90 sekonda para mesnatës, më afër orës së themelimit të vitit 1947.
“Rusia mund të ishte përgjigjur jo vetëm me armë bërthamore, por me sulme masive kibernetike ose duke synuar rrugët e furnizimit për armët perëndimore,” tha Lukyanov.
“Problemi është se sa më gjatë që Rusia të mos reagojë, aq më shumë ka gjasa që përgjigja të jetë jashtëzakonisht e fortë për të demonstruar përkushtim ndaj objektivit.
Dyshimet se Putini ishte mashtruar nga këshilltarët e tij në lidhje me realitetet e zymta të luftës ishin të gabuara, shtoi Lukyanov.
“Ai nuk dukej si një person që nuk e di se çfarë po ndodh. Ai dukej sikur kishte informacion të saktë.
Por ky informacion nuk e shqetëson shumë atë”
Një figurë e izoluar
Dhe ndërsa dikur ai u portretizua nga propaganda ruse si një njeri i drejtpërdrejtë i popullit, Putin tani është një figurë e izoluar, komenton botimi.
Në prag të Krishtlindjeve ortodokse, ai ndoqi shërbimin i vetëm në një katedrale të Kremlinit që ishte e ndaluar për të gjithë besimtarët e tjerë. Në dhjetor, ai anuloi papritur konferencën e tij vjetore për shtyp dhe sesionin e televizionit me pyetje dhe përgjigje me popullin rus, si dhe fjalimin e tij për gjendjen e kombit në parlament.
Kritikët pretendojnë se Putini heziton t’u përgjigjet pyetjeve të vështira rreth luftës, sepse ai e di se nuk mund të japë përgjigje kuptimplota.
“Një vit më vonë, Putin nuk ka asgjë për t’iu përgjigjur pyetjes kryesore: ‘Si e sheh ai një rrugëdalje nga situata që krijoi?”, tha Leonid Volkov, një ish ndihmës i lartë i Alexei Navalny, liderit të opozitës ruse të burgosur.
“Kjo pyetje bëhet nga gjeneralët dhe biznesmenët: rrethi i Putinit nuk e kupton se për çfarë qëllimi kanë ndodhur të gjitha këto humbje dhe privime.
Por Putin nuk ka përgjigje. Heshtja është vrastare. Dhe do të bëhet edhe më e fortë”.
Shëndeti i presidentit rus
Putini kaloi pjesën më të madhe të pandemisë i izoluar në rezidencat e tij në Moskë dhe Soçi. Vizitorëve iu kërkua të kalonin nëpër “tunelet” e dezinfektimit përpara se të hynin, dhe zyrtarët u urdhëruan të vetëkarantinohen deri në 14 ditë përpara se të lejoheshin të takonin presidentin.
Urdhri i vetëizolimit kuptohet se mbetet në fuqi: Andrei Bokharov, guvernator i rajonit të Volgogradit, nuk ishte parë në publik për gati dy javë përpara se të takohej me Putinin këtë muaj.
Masat përkojnë me spekulimet e vazhdueshme për shëndetin e Putinit. Inteligjenca ushtarake ukrainase tha së fundmi për ABC Neës, duke cituar burime të paidentifikuara, se udhëheqësi rus ishte i sëmurë me kancer.
Kremlini këmbëngul se Putini është në gjendje të mirë shëndetësore, por ai është parë duke çaluar në publik dhe duke u mbajtur në anët e tavolinave me dorën e djathtë gjatë bisedimeve.
Para luftës, ai u raportua se ishte kontrolluar dhjetëra herë nga një specialist i kancerit. Ai gjithashtu mendohej se kishte bërë banjë me gjak nga brirët e drerit, një ilaç tradicional në rajonin Altai të Siberisë jugore për një sërë sëmundjesh, raporton abcnews.al.
Gjithashtu ekziston edhe një frikë për gjendjen mendore të Putinit. “Ai reagon ndaj imazheve në kokën e tij,” tha Gleb Pavlovsky, një ish-këshilltar i Kremlinit, për The Times në fillim të luftës.
Gjatë fjalimit të tij televiziv në natën e Vitit të Ri, i cili tradicionalisht jepet në sfondin e Kremlinit, Putin qëndroi përballë një rresht njerëzish me fytyrë të zymtë me uniforma ushtarake.
Në fjalimin e tij prej nëntë-minutash, më i gjati ndonjëherë për një mesazh të Vitit të Ri, ai sulmoi Perëndimin, duke e akuzuar atë për përdorimin e luftës në Ukrainë për të “dobësuar dhe përçarë” Nënën Rusi.
Jeta e fshehtë dhe private e presidentit rus
Jeta private e Putinit mbetet sekrete. Zyrtarisht, ai është beqar që nga viti 2014 kur u nda nga Lyudmila, një ish stjuardesë e Aeroflot.
Jozyrtarisht, Putini besohet të ketë një marrëdhënie afatgjatë me Alina Kabaeva, një ish-gjimnaste olimpike, e cila u emërua në krye të një kompanie mediatike pro-Kremlinit në vitin 2014.
Kabaeva, 39 vjeç, është sanksionuar nga Britania, Bashkimi Europian dhe Shtetet e Bashkuara. Javën e kaluar ajo e përshkroi televizionin shtetëror rus si një “armë lufte” të krahasueshme në fuqi me një kallashnikov. ”
Dy vajzat e rritura të Putinit nga martesa e tij me Lyudmila, Maria Vorontsova, 37, dhe Katerina Tikhonova, 36, janë të dyja të sanksionuara nga Perëndimi.
Kremlini kurrë nuk e ka pranuar publikisht marrëdhënien e tyre me Putinin, por SHBA-ja ka thënë se ka indikacione se ata rreth tyre kanë përfituar nga statusi i tyre.
Tikhonova ishte martuar më parë me Kirill Samalov, një biznesmen, pasuria e të cilit u shumëfishua kur u bë dhëndër i Putinit në vitin 2013. Putin gjithashtu besohet se ka tre fëmijë me Kabaeva, por identiteti i tyre nuk është bërë i ditur kurrë, raporton abcnews.al.
Udhëheqësi rus besohet gjithashtu të ketë një vajzë adoleshente të quajtur Elizaveta nga një marrëdhënie që kishte gjatë mandatit të tij të parë me Svetlana Krivonogich, një pastruese nga Shën Petersburgu. Krivonogich, e cila u bë e pasur pas marrëdhënies së saj me Putinin, është sanksionuar gjithashtu nga Britania.
I indinjuar… në qoshe
Nuk ka asnjë shpresë se Putini do të tërhiqet nga Ukraina, tha Stanovaya. I vendosur në cep dhe i zemëruar, ai është i bindur se nuk ka zgjidhje tjetër veçse të përpiqet të shtypë atë që ai e sheh si një kërcënim të papranueshëm për Rusinë: një qeveri pro-NATO-s në Kiev, tha ajo.
Në botëkuptimin e Putinit, Perëndimi mban përgjegjësinë e plotë për shkaktimin e luftës dhe përfundimi i konfliktit është realisht i mundur vetëm nëse vendet perëndimore tërhiqnin mbështetjen e tyre për Ukrainën.
“Putini dhe elita ruse e shohin këtë luftë si një luftë ekzistenciale. Nëse Rusia humbet, nëse ka sulme në Krime, mendoj se është psikologjikisht i përgatitur për të përdorur armë bërthamore”, tha Stanovaya.
“Putini beson se i ka dhënë Ukrainës shumë kohë për t’u armatosur. Tani ai beson se nëse nuk bën asgjë, Rusia do të pushojë së ekzistuari pas disa vitesh.
E vetmja keqardhje i tij është se pse nuk e filloi luftën më herët”.
/abcnews.al
