Loading ...
Një rekord i ri është shënuar në Mbretërinë e Bashkuar, ku 28,076 emigrantë kanë kaluar Kanalin me gomone gjatë këtij viti, një rritje prej 46% krahasuar me të njëjtën periudhë të vitit 2024, sipas të dhënave zyrtare të publikuara të hënën.
Ky zhvillim po ushtron presion të shtuar mbi kryeministrin Keir Starmer dhe qeverinë e tij laburiste, përballë një shqetësimi në rritje të opinionit publik lidhur me emigracionin, çështja që aktualisht renditet si prioriteti kryesor për qytetarët britanikë, sipas sondazheve të fundit. Ndërkohë, protestat kundër emigrantëve po vazhdojnë jashtë hoteleve që strehojnë azilkërkues.
Rekordi i ri u arrit të dielën, kur 212 emigrantë mbërritën në katër varka të ndryshme në brigjet britanike. Zyra e Brendshme nuk ka dhënë ende një koment mbi këtë situatë.
Fundjava që lamë pas shënoi protesta të shumta në disa qytete të Britanisë, pas një vendimi gjyqësor që urdhëroi largimin e azilkërkuesve nga një hotel në Epping, në verilindje të Londrës – një tjetër pikë e nxehtë në debatin gjithnjë e më të polarizuar për emigracionin.
Qeveria e Starmer ka premtuar të ndërpresë përdorimin e hoteleve për strehimin e emigrantëve deri në vitin 2029 dhe të reformojë sistemin e azilit. Të dielën u njoftuan ndryshime të reja për të përshpejtuar proceset e apelimit dhe për të reduktuar një stok prej mbi 100,000 kërkesash të pashqyrtuara.
Ministrja e Brendshme, Yvette Cooper, deklaroi se ndryshimet kanë për qëllim rivendosjen e “kontrollit dhe rendit” në një sistem që ajo e përshkroi si “në kaos të plotë”.
Të dhënat zyrtare të javës së kaluar treguan se kërkesat për azil janë në nivelet më të larta ndonjëherë dhe se më shumë emigrantë po strehohen në hotele sesa vitin e kaluar.
Nga ana tjetër, lideri i partisë së djathtë Reform UK, Nigel Farage – i cili ka kryesuar në disa sondazhe të fundit – ka shpallur plane për “deportime masive” të emigrantëve që mbërrijnë me gomone. Ai ka propozuar largimin e Britanisë nga Konventa Europiane për të Drejtat e Njeriut, ndalimin e kërkesave për azil dhe ndërtimin e qendrave të ndalimit për 24,000 persona.
Në një intervistë për The Times, Farage deklaroi se do të nënshkruante marrëveshje për riatdhesim me vende si Afganistani dhe Eritrea, dhe do të organizonte fluturime të përditshme për deportime.
Situata aktuale pritet të mbetet një nga temat më të debatueshme në politikën britanike në muajt e ardhshëm, me ndikim të drejtpërdrejtë në qëndrueshmërinë e qeverisë Starmer. / abcnews.al /
