Komuniteti Mysliman i Shqipërisë shprehet i shqetësuar në lidhje me idenë e krijimit të shtetit sovran të Urdhrit të Bektashinjve në Shqipëri.
Në një kohë kur në vend nuk ka konflikte fetare dhe dominon fryma e dialogut, Komuniteti Mysliman i Shqipërisë thekson se nisma të tilla mund të jenë një precedent i rrezikshëm për të ardhmen e vendit.
“Kjo nismë për të cilën jemi njohur përmes medias është e pakonsultuar me komunitetet fetare, të cilat për të tilla raste kanë ngritur edhe një institucion të veçantë, siç është Këshilli Ndërfetar i Shqipërisë. Vendi ynë nuk ndodhet përballë ndonjë rreziku të prishjes së harmonisë e dialogut, përkundrazi, nisma të tilla mund të jenë një precedent i rrezikshëm për të ardhmen e vendit”.
Komuniteti Mysliman i Shqipërisë thekson se do të ndjekë me vëmendje këtë çështje dhe do të ndërmarre hapat e nevojshme konform Kushtetutës dhe ligjeve të vendit tonë.
Vetëm pak ditë më parë New York Times raportoi se në Tiranë po projektohet krijimi i një mikroshteti për besimtarët bektashinj. Për potencialin e krijimit të këtij shteti sovran, Rama foli edhe para Asamblesë së Përgjithshme të OKB në New York, duke nënvizuar se shqiptarët gjate gjithë historise kanë dhënë shembuj të tolerancës fetare.
