Pas reagimit të Kryeministrit Edi Rama në Twitter, ku theksonte se Presidenti ul vartësist e tij për të përgatitur dokrra “ligjore” erdhi edhe kundërpërgjigja e Presidencës. Në një njoftim për mediat zëdhënësi i Presidentit, Tedi Blushi, e quajti reagimin e kreut të qeverisë aspak serioz lidhur me çështjen e projektit të “Unazës së Re”.
Ai kujtoi se vlera e fondit limit të shpallur nga ARRSH për rehabilitimin e segmentit rrugor nga mbikalimi i Pallatit me Shigjeta – Rrethrrotullimi i sheshit “Shqiponja” ka qenë 18 116 534 Euro, ndërsa kompania fituese “DH Albania” e ka fituar vetëm me 2 Euro më pak, 18 116 532 Euro.
Blushi shton më tej se pas kësaj lindin dy pyetje për Kryeministrin.
“A ka kërkuar sipas rregullave të prokurimit publik qeveria dhe ARRSH konfiskimin e kësaj vlere (sigurimin e kontratës) për llogari të Shtetit Shqiptar, pasi u faktua se kontratën e kishin lidhur me një kompani fantazëm?
A ka mundur shteti të garantojë interesin publik në këtë rast, duke konfiskuar sigurimin e kontratës, apo edhe ky dokument (sigurimi i kontratës) ka qenë i falsifikuar?
Këto dhe shumë detyra të tjera, ligji ja ngarkon Kryeministrit dhe vartësve të tij që t’i bëjnë. Shtëpia me tjegulla dhe shteti me rregulla, thotë populli ynë”, përfundon ai./abcnews.al
