Kryeministri Rama më anë të një statusi në facebook ka reaguar përsëri në lidhje me shembjen e teatrit kombëtar.
Kësaj radhe Kryeministri ka zgjedhur një postim të shkrimtarit Çun Lajçi, i cili përmes një poezie për teatrin shkruan se godina ishte e rrënuar dhe se artistëve u duhet një i ri.
Rama shkruan se godina është shembur me vonesë dhe se uron ta takojë Çunin e Bjeshkëve të Namuna kur të hapen dyert e teatrit të ri.
“Teatri i ri padiskutim do të jetë një Teatër Kombëtar që do të hyjë në listën e teatrove më të bukur europianë”, shkruan Rama.
Postimi i kryeministrit:
ÇUN LAJÇIN e njoh si Çuni i Plisit të Bardhë e i një “grushti dhé”, ai që lidhi me një fill emocionesh unike diasporën shqiptare me tokën amë që digjej nga lufta dhe u kthye përmes artit të tij, në ikonën shpirtërore të popullit gjatë asaj kohe të mallkuar…
Po ta njihja personalisht apo po të mos më kishte thumbuar edhe mua në rreshtat bashkëlidhur, nuk do ta postoja këtu çka ai ka postuar me një vrazhdësi kaq të kthjellët, mbi këtë sherrnajën vulgare për një godinë të gabuar që u shemb me një vonesë dhjetra e dhjetra vjeçare!
Uroj ta takoj Çunin e Bjeshkëve të Namuna kur si dy “të çmendun” mes plot normalësh, të hapim dyert e Teatrit të Ri Kombëtar, i cili nuk do të jetë si ai i Shkupit nga forma neoklasike e zgjedhur për arsye ideologjike, por padiskutim do të jetë një Teatër Kombëtar që do të hyjë në listën e teatrove më të bukur europianë të ndërtuar në kohët moderne./abcnews.al
