Franca është në ditë zie këtë të hënë, teksa do i jepet lamtumira ish-Presidentit Jacques Chirac, i cili u nda nga jeta në moshën 86-vjeçare. Në ceremoninë mortore ndodhen edhe liderë të vendeve të ndryshme, ndërsa mes tyre është edhe kryeministri Rama.
Ai ka postuar në rrjetet sociale disa foto ku përpara shërbesës ceremoniale është takuar me disa liderë të vendeve të ndryshme. Mes tyre është ish-Presidenti i SHBA-së, Bill Clinton; kryeministri i Hungarisë, Viktor Orban; kryeministri belg, Charles Michel etj. Gjithashtu, kreu i qeverisë sonë është takuar edhe me presidentin e Kosovës, Hashim Thaçi.
Arkivoli me trupin e pa jete të politikanit të shquar francez u vendos që dje në mesdite në Hotel Des Invalid në Paris. Që nga ora 14:00 e ditës së djeshme deri mëngjesin e sotëm mijëra qytetarë francezë kanë qëndruar para godinës në radhë për të hyrë brenda saj, për të nderuar kujtimin e Jacques Chirac duke u përkulur para arkivolit me trupin e tij./abcnews.al
