Gazeta prestigjoze BILD ka publikuar së fundmi një shkrim ku tregon për një përplasje deklaratash mes kryeministrit Edi Rama dhe ministrit gjerman të Shëndetësisë, Jens Spahn.
Kundërpërgjigja e Ramës në BILD, ndaj ministrit gjerman, vjen pas deklaratave të këtij të fundit lidhur me udhëtime jashtë vendit dhe Ballkanit.
Spahn ka deklaruar për BILD se vitin e kaluar rreth 50% e rasteve të reja në Gjermani erdhën si pasojë e udhëtimeve në Ballkan e Turqi, dhe këtë vit duhet parandaluar. Ndërkohë Rama ka dalë hapur kundër kësaj deklarate madje duke e kritikuar ashpër ministrin e Shëndetësisë në Gjermani Jens Spahn.
Edi Rama për BILD: “Është një skandal që një ministër gjerman denoncon publikisht Ballkanin dhe kështu gjithashtu zhvlerëson njerëzit me një sfond migrimi”.
Rama mësohet se ka shtuar më tej: “Unë nuk do të lejoj që Shqipëria të portretizohet si një zonë rreziku për udhëtimet e pushimeve, nuk ka shifra për ta provuar këtë”.
Më tej Rama ka hedhur kritika ndaj Spahn, duke thënë: “Një ministër gjerman i shëndetësisë duhet të kujdeset për vaksinimin e popullsisë gjermane dhe të mos zgjojë pakënaqësi stereotipike kundër Ballkanit në mënyrë që të mbrojë një rekord të dukshëm të keq.”
Ndërkohë BILD sqaron se deklaratat e Ramës kanë ardhur pas akuzave të ngritura nga Spahn ku deklaronte se 50% e infektimeve në Gjermani verën e kaluar erdhën nga udhëtimet e jashtme.
Spahn: “Ne mësuam nga vera e kaluar. Në atë kohë, udhëtimet jashtë vendit, shpesh vizitat te të afërmit në Turqi dhe Ballkan, shkaktuan rreth 50 përqind të infeksioneve tona të reja në faza. Ne duhet ta parandalojmë këtë këtë vit “.
Sipas Spahn, vizitat tek të afërmit nuk duhet të ndalohen këtë verë.
“Në këtë fazë të fundit të pandemisë, vlen kujtesa që të jini vigjilent,” tha Spahn. /abcnews.al/
