Loading ...Një raketë e braktisur e kompanisë SpaceX pritet të përplaset me Hënën me shpejtësi të lartë, në një ngjarje që po ndiqet me interes nga komuniteti shkencor.
Raketa, e lëshuar në vitin 2025, ka qëndruar në hapësirë për më shumë se një vit, duke lëvizur pa kontroll, përpara se trajektorja e saj ta çonte drejt sipërfaqes hënore.
Sipas ekspertit të gjurmimit të objekteve hapësinore Bill Gray, përplasja pritej të ndodhte rreth orës 07:35 me orën e Mbretërisë së Bashkuar me një shpejtësi prej rreth 8,700 kilometrash në orë, afërsisht shtatë herë më e madhe se shpejtësia e zërit. Deri tani nuk ka ende një konfirmim zyrtar për momentin e përplasjes.
Ekspertët vlerësojnë se energjia e goditjes do të jetë e barabartë me shpërthimin e rreth tre tonëve TNT, duke krijuar një krater me diametër nga 20 deri në 30 metra. Megjithatë, ai do të jetë shumë i vogël për t’u dalluar me sy të lirë nga Toka.
Ngjarja konsiderohet një mundësi e rrallë për shkencëtarët, të cilët do të studiojnë efektet e një përplasjeje në sipërfaqen e Hënës dhe rrezikun që mbetjet hapësinore mund të paraqesin për misionet e ardhshme dhe astronautët.
Përplasja pritet të ngrejë një re pluhuri dhe copëzash shkëmbore, e cila do të monitorohet nga teleskopët dhe observatorët në mbarë botën.
