Gjykata ruse e ka cilësuar ish kryeministrin, Mikhail Kasyanov “agjent të huaj”. Vendimi vjen pas largimit të tij nga vendi, duke denoncuar pushtimin e Ukrainës.
Kasyanov, i cili ishte kreu i parë i qeverisë së Vladimir Putin në fillim të viteve 2000, tani është në listën e “agjentëve të huaj” të Departamentit të Drejtësisë, një emërtim poshtërues që të kujton “armikun e popullit” të epokës sovjetike.
Në veçanti, ministria akuzon Kasyanovin se është “kundër operacionit ushtarak special në Ukrainë” dhe se është “anëtar i komitetit rus kundër luftës, një organizatë, aktivitetet e së cilës synojnë diskreditimin e politikës së jashtme dhe të brendshme ruse”.
Ky komitet me aktivitet shumë të kufizuar, është krijuar jashtë vendit në vitin 2022 nga disidentë rusë, mes të cilëve edhe ish-oligarku i mërguar Mikhail Khodorkovsky.
Kryeministri i Putinit gjatë viteve të tij të para në pushtet, nga viti 2000 deri në vitin 2004, Kasyanov më pas u bë shumë kritik ndaj presidentit rus.
Në qershor 2022, Kasyanov tha për AFP se ai nuk e njihte më Vladimir Putinin me të cilin kishte punuar, duke thënë se shpresonte që Rusia një ditë të kthehej në “rrugën demokratike”.
Para pushtimit të Ukrainës, Kasyanov ishte udhëheqësi i Partisë së Lirisë së Popullit (PARNAS), një parti e vogël liberale. Në qershor 2022, ai njoftoi se ishte larguar nga Rusia.
Statusi i “agjentit të huaj” u vendoset personave ose subjekteve që i nënshtrohen kufizimeve të rrepta administrative, siç është kontrolli i rregullt i burimeve të tyre të financimit.
Kremlini ka shtuar përpjekjet për të shtypur çdo zë kritik që nga fillimi i pushtimit rus të Ukrainës në shkurt 2022. Pothuajse të gjithë disidentët e shquar janë në burg ose të internuar jashtë vendit.
/abcnews.al
