Shqipëria e femrave luan kundër Qipros dhe Portugalisë, më 27 nëntor dhe 1 dhjetor, ndërkohë që trajneri Armir Grima ka përzgjedhur vajzat që do të ketë në dispozicion për këto dy sfida të fundit për kualifikueset e EURO 2021. Ndeshja e parë luhet në Shkodër, prej orës 14:00, në stadiumin “Loro Boriçi”.
Grima ka dalë sot në konferencë shtypi dhe ka deklaruar: “Patjetër që ndeshjen me Qipron pretendojmë që ta fitojmë. Mendojmë që i kemi mundësitë dhe kapacitetet ta kalojmë këtë ndeshje në favorin tonë. Normalisht edhe ndeshja me Portugalinë është ndeshje që ne na lë hapësira për të menduar që të shkojmë për një rezultat pozitiv”.
GJENDJA FIZIKE – “Ne ditën e hënë i grumbullojmë vajzat dhe aty do të shohim edhe gjendjen fizike të çdo lojtareje. Kemi probleme, nuk është vetëm problem që kemi pas me Arbionën, por kemi edhe disa probleme me vajza të tjera. Gjithsesi do i shohim nga afër gjërat dhe gjendjen fizike të vajzave.
Covid 19? Është e vërtetë që jemi në një kohë, po them të çuditshme me këtë pandemi. Edhe ne normalisht kemi marrë masat tona, kjo është lista paraprake. Përveç kësaj kemi edhe listën rezervë, që për çdo të papritur të jemi të gatshëm për të njoftuar vajzat e tjera për t’i pasur pranë ekipit”.
ECURIA – “Unë mendoj që kemi bërë një paraqitje të mirë. Nuk mund të them shumë të mirë, por të mirë, të kënaqshme. Kemi paraqitur futboll stabël, nuk jemi më ai ekipi që kemi luhatje nga më të ndryshmet. Jemi një ekip stabël, japim lojëra të mira, jemi munduar të marrim rezultate të mira dhe besoj që edhe për tifozët ka qenë një ekip simpatik dhe i bukur për t’u parë në fushë.
Çdo fitore në këto momente për futbollin e femrave është shumë, sepse nuk është vetëm pjesa që ne duhet të kualifikohemi. Ne duhet t’i ngjisim shkallët avash-avash për të shkuar tek ai pretendim. Por në këto momente që është futbolli i femrave në Shqipëri, besoj që çdo fitore është shumë, për çdo vajzë që luan futboll. Moralisht është shumë e mirë, por normalisht edhe pikët janë shumë të mira sepse na ngjisin që vitin tjetër të kemi edhe një vend më shumë në kualifikim”.
MBROJTJA – “Në mbrojtje jemi të kushtëzuar edhe nga vajzat që luajnë në këtë repart. Gjithsesi besoj që jemi të stabilizuar, nuk jemi më si në fillimet tona që kemi pasur probleme shumë në pësimin e golave. Besoj që jemi stabilizuar dhe kemi një repart të mirë, ku dihet që me ekipet kundërshtare që kemi në shumë të forta, dihet që pesha kryesore shkon te mbrojtja. Dhe nuk është se ne gabojmë veç te mbrojtja, te reparti i mbrojtjes por gabimet shkojnë bashkërisht me mesfushën dhe i gjithë ekipi kur gabojmë”, përfundoi Grima. /abcnews.al
