Të paktën tre persona u vranë dhe 66 u plagosën gjatë përleshjeve mes policisë dhe protestuesve për zgjedhjet e diskutueshme në Mozambik. “Nga 66 të plagosurit, 57 ndoshta u plagosën me armë zjarri, katër u plagosën kur u rrëzuan, tre u plagosën nga agresioni fizik dhe dy u plagosën nga armë të mprehta”, tha Dino Lopes, drejtor i shërbimeve të urgjencës në Spitalin Qendror të Maputos, shkruan Reuters.
Shumica e viktimave janë të moshës 25 deri në 35 vjeç, dhe disa ishin vetëm 15 vjeç, tha ai në konferencën për shtyp. Mijëra njerëz dolën dje në rrugët e kryeqytetit Maputo duke thirrur “Frelimo duhet të bjerë”, duke ngritur barrikada në rrugë me goma të djegura dhe duke hedhur gurë.
Të paktën 18 persona u vranë gjatë protestave të mëparshme të organizuara pas zgjedhjeve të 9 tetorit, për të cilat opozita pretendon se ishin të manipuluara. Qendra Mozambike për Demokraci dhe të Drejtat e Njeriut deklaroi se 34 persona kanë vdekur deri më tani.
Protestat e djeshme janë më të mëdhatë që Mozambiku ka parë ndonjëherë kundër Frelimo, partia që ka qeverisur vendin jugor të Afrikës që nga viti 1975 dhe u shpall fituese në zgjedhjet e muajit të kaluar me një dërrmues.
Grupet civile dhe vëzhguesit ndërkombëtarë kanë deklaruar se votimi nuk ka përmbushur standardet demokratike dhe Këshilli Kushtetues i vendit ka kërkuar sqarime nga komisioni zgjedhor për mospërputhjet në numërimin e votave./abcnews.al
