Prokuroria për Krime të Rënda përfundoi hetimet dhe çoi për gjykim dosjen me 9 persona të akuzuar për trafikun e 2.5 tonë kanabis nga Shqipëria në Gjermani. Kamioni me këtë sasi drogë u kap në janar të 2017 në Ankona të Italisë. Mjeti u kontrollua dhe u bllokua për mungesë dokumentacioni, por më pas rezultoi se ai kishte një sasi gjigande kanabisi që po transportohej.
Nga hetimet e Prokurorisë ka rezultuar se kamioni u nis nga Porti i Durrësit në drejtim të Ankonës në Itali më datë 3 janar 2017. Automjeti drejtohej nga Dhimo Koraj, ndërsa destinacioni përfundimtar ishte në Gjermani ku pritës i saj ishte Euron Hoti. Lënda narkotike ishte fshehur mes paletave me lëndë drusore, që ishte marrë në një kompani në Gramsh. Ajo do të transportohej përmes një shoqërie nga Fieri në drejtim të Gjermanisë./abcnews.al
