Kandidatja republikane për presidente Nikki Haley është zotuar të vazhdojë fushatën e saj pas humbjes së dytë radhazi ndaj Donald Trump. Haley vizitoi pjesën më të madhe të New Hampshire përpara zgjedhjeve paraprake të së martës, duke u përballur me votuesit e pavarur dhe të moderuar republikanë.
Por ajo nuk ishte në gjendje të mposhte Trump, i cili kishte një epërsi prej 10% me shumicën e votave të numëruara. Ish-presidenti javën e kaluar fitoi në Iowa.
Haley është e vetmja rivale e Trump, me largimin e papritur të guvernatorit të Floridës Ron DeSantis nga fusha republikane.
Mbrëmë Haley pranoi rezultatin në New Hampshire, duke e uruar Trump për fitoren e tij. Por ajo u zotua se do të përpiqet për të fituar në Karolinën e Jugut, shteti ku ajo shërbeu si guvernatore.
“Kjo garë nuk ka përfunduar. Kanë mbetur dhjetëra shtete të tjera. Dhe i radhës është shteti im i ëmbël i Karolinës së Jugut,” tha ajo.
Fitoret e lehta në të dy shtetet tregojnë aftësitë e Trump për të bashkuar rreth vetes rrymat e ndryshme republikane.
Ai fitoi mbështetjen e konservatorëve evangjelistë që kanë ndikim tek votuesit më të moderuar në shtetet Iowa dhe New Hampshire, dhe shpreson ta përsërisë ndërsa zgjedhjet paraprake zgjerohen edhe në shtetet e tjera amerikane.
/abcnews.al
