Loading ...
Bledi Shkëmbi është zyrtarizuar te Dinamo një ditë më parë, kurse sot ka dalë para mediave dhe ka thënë fjalët e para për këtë lëvizje. Pasi falënderoi drejtuesit dhe veçanërisht presidentin Adrian Bardhi, korçari u shpreh:
“Për një trajner të ri si mua është e pamundur t’i thuash jo Dinamon. Shpresoj të kem fatin që ta kthej këtë skuadër në ato nivele që ka qenë më parë, duke fituar tituj dhe duke arritur në Europë. Presidenca ka objektiv që të fitojmë, por në këto momente do të shikojmë se çfarë lojtarësh do të afrojmë. Objektivat do të jenë madhorë”.
Me tej Shkëmbi shtoi: “Është e vështirë të rifillosh nga 0 për të luftuar për vendet e sipërme të klasifikimit, por gjëja e mirë është se emri i Dinamos ka një impakt te lojtarët dhe shumë prej tyre janë gati të bashkohen me ne.
Kemi disa emra dhe disa prej tyre kanë firmosur, edhe pse nuk janë prezantuar. Jemi në bisedime edhe me disa prej tyre. Shumë emra që dalin në media nuk janë të vërtetë, pasi ne kontaktojmë vetëm me ata lojtarë që janë pa kontratë. Duam të jemi korrekt me klubet e tjera.
Presidenca ka krijuar një buxhet dhe na është komunikuar. Ne punojmë së bashku, duke vendosur emrat dhe kushtet financiare që kemi në dispozicion. Nuk kërkojmë lojtarë të mbivlerësuar, por lojtarët më të mirë që ne mendojmë se meritojnë ato kushte financiare.
Po mundohemi të krijojmë një bosht me lojtarë të kampionatit shqiptar e më pas do të shikojmë. Që në momentin e parë presidenti ka dashur që të zgjedhë kompleksin, hotelin ku do të qëndrojnë lojtarët e kjo për mua e lojtarët është një gjë shumë pozitive.
Ne si staf mendojmë se lojtarët shqiptarë janë më të rëndësishëm. Nuk duhet të largohemi shumë nga Ballkani për të gjetur lojtarë. Mendoj se lojtarët nga Maqedonia e Veriut, Kroacia e Serbia janë ata që na përshtaten më shumë”. /abcnews.al
