27 fitore në 29 ndeshje dhe 25 pikë më shumë se vendi i dytë. Liverpool ka zhvilluar një kampionat fenomenal dhe fitimi i titullit kampion është çështje kohe. Premier League do të rifillojë në datë 17 qershor dhe kanë mbetur për t’u zhvilluar nëntë javë.
Trofeu i madh mungon prej 30 vitesh në Anfield dhe Jurgen Klopp e ka mendjen te tifozët. Festa e madhe rrezikohet për shkak të koronavirusit, por trajneri gjerman ka një mesazh për ta në një prononcim për BBC.
“Gjithmonë mund të festohet, pavarësisht ku ndodhesh. Nëse shpallemi kampionë, çfarëdo feste të jetë e mundur, ne do ta bëjmë atë. Dhe me të gjithë tifozët tanë kur të na lejohet ta bëjmë përsëri.
Nëse ndodh diçka e tillë, premtoj që do të zhvillohet edhe një paradë. Na mjafton një ditë ku të gjithë mund të vijnë për të festuar së bashku“, thekson trajneri i kampionëve të Evropës. /abcnews.al
