Zhvillime të reja dhe të shpejta priten për sa i përket menaxhimit të reklamave politike nga Facebook dhe Instagram, pasi sipas Politico brenda ditës dy mediat e njohura sociale do të jenë nën hetim nga autoritetet europiane.
Konkretisht, sipas publikimit, hetimet ka të ngjarë të synojnë një sërë çështjesh, duke përfshirë trajtimin e reklamave nga Meta, veçanërisht politikat, për të shqyrtuar shkeljet e mundshme të Aktit të Shërbimeve Dixhitale (DSA).
Politico raportoi përsëri këtë muaj se një fushatë ruse për të ndikuar në Parlamentin Europian në qershor po lulëzonte në Facebook, duke promovuar narrativa pro-Kremlinit me reklama të blera përmes llogarive të rreme.
Qindra miliona europianë do të shkojnë në qendrat e votimit më 6-9 qershor për të zgjedhur anëtarët e rinj të Parlamentit, të cilët do të përcaktojnë axhendën e BE-së për pesë vitet e ardhshme.
Qeveritë e BE-së janë të shqetësuara për rritjen e ndërhyrjes ruse që mund të ndikojë në pikëpamjet e votuesve.
Madje, një ministër francez paralajmëroi se vendi është “i pushtuar nga propaganda”.
Por Meta është marrë në pyetje nga rregullatorët prej muajsh edhe për çështje të tjera, që nga mënyra sesi trajton videot e paligjshme ose të dëmshme të postuara nga përdoruesit në rrjetet sociale, deri te shqetësimet më të përgjithshme për dezinformimin dhe mënyrën se si të rinjtë përdorin shërbimet dixhitale.
Komisioni Europian i kërkoi Metës të përgjigjet në tetor në lidhje me materialin që lidhet me sulmin e Hamasit ndaj Izraelit dhe në nëntor kërkoi informacion për integritetin e zgjedhjeve.
Në dhjetor, i kërkoi kompanisë të adresojë shqetësimet e shëndetit mendor dhe fizik në lidhje me mënyrën se si të miturit përdorin shërbimet e saj, si dhe algoritmin e saj dhe fotot intime të të miturve.
Vetëm muajin e kaluar BE-ja kërkoi informacion në lidhje me algoritmet, modelin e ri të abonimit pa reklama të Meta-s, aplikacionin Threads. Zëdhënësi i Meta, Ben Walters tha se kompania ka “një proces specifik për të identifikuar dhe zbutur rreziqet në platformat tona.
“Mezi presim të vazhdojmë bashkëpunimin tonë me Komisionin Europian dhe t’i ofrojmë më shumë detaje mbi këtë projekt ”, tha ai.
Ekzekutivi i BE-së mbikëqyr sesi platformat kryesore në internet përputhen me rregullat dixhitale që i detyrojnë ato të frenojnë përmbajtjen e paligjshme dhe të dëmshme, siç është dezinformimi, sipas DSA.
Hetimet do ta bëjnë Metën kompaninë e tretë që do të jetë në shënjestër të hetimeve të DSA. Meta po padit veçmas Komisionin Europian për taksën që duhet të paguajë për të financuar zbatimin e DSA.
Meta tha se po paguante 11 milionë euro për vitin 2024, pothuajse një e katërta e asaj që BE-ja tha se kishte nevojë.
/abcnews.al
