Poker dhe kokainë, “Game Over” çon dy shkodranë pas hekurave

Dy persona janë arrestuar në Shkodër, një është shpallur në kërkim dhe një tjetër është proceduar në gjendje të lirë, pasi kishin përshtatur lokalin për zhvillimin e lojërave të fatit dhe shpërndarjen e lëndëve narkotike. Gjatë operacionit të koduar “Game Over” janë sekuestruar disa doza kokainë, 1 tavolinë pokeri, 2 makineta të lojërave të fatit, çipsa dhe letra për poker.

Të arrestuarit janë;

1. P., 21 vjeç, banues në Shkodër, për veprat penale “Fshehja e të ardhurave”, “Ushtrimi i një aktiviteti tregtar të paligjshëm ose të paregjistruar në organet tatimore”, “Organizimi i lotarive të palejuara”, “Vënia në dispozicion e lokaleve për lojëra të palejuara” dhe “Pastrimi i produkteve të veprës penale ose veprimtarisë kriminale”.
2. M., 19 vjeç, banues në Shkodër, për veprat penale “Prodhimi dhe shitje e narkotikëve” dhe “Organizimi i lotarive të palejuara”.

U procedua në gjendje të lirë G. Sh., 33 vjeç, banues në Shkodër, si dhe u shpall në kërkim R. P., 29 vjeç, banues në Shkodër, për veprën penale “Organizimi i lotarive të palejuara”.

Por si u arrestuan?

Policia thekson se pas informacioneve në rrugë operative se në një lokal në zonën e Vrakës, Boric i Madh, disa persona ushtronin veprimtarinë e kundërligjshme të lojërave të fatit dhe shpërndanin lëndë narkotike ushtruan kontroll.

“Në momentin e ndërhyrjes nga shërbimet e Policisë, këta persona janë kapur në flagrancë duke zhvilluar lojën e pokerit, të cilën po e organizonte G.  Sh. Gjatë kontrollit të ushtruar, në lokal janë konstatuar një tavolinë pokeri, dy makineta të lojërave të fatit, çipsa dhe letra që përdoren për lojërat e fatit.

Gjatë kontrollit fizik të ushtruar ndaj personave që ndodheshin në ambientet e lokalit, shërbimet e Policisë, S. M. i kanë gjetur një sasi të vogël me lëndë narkotike të dyshuar kokainë, ndërsa R. P. iu gjet një sasi e konsiderueshme parash. Gjithashtu, gjatë kontrollit të ushtruar në ambientet e lokalit u gjeten 9 doza me lëndë narkotike të llojit kokainë.

Gjatë operacionit janë sekuestruar në total: 10 doza me lëndë narkotike të dyshuar kokainë, 1 tavolinë pokeri, 2 makineta të lojërave të fatit, çipsa dhe letra për lojën e pokerit, 1 aparat celular dhe një shumë parash” mbyllet njoftimi i policisë Shkodër./ db/ Abcnews.al