Kryeministri kroat Andrej Plenkoviç këtë të mërkurë ka thënë se kompleksiteti i situatës në Kosovë i kontribuon fakti se vendimi për njohjen e saj do të ishte fatal për karrierën politike të çdo politikani serb.
Plenkoviç këto komente për Kosovën i bëri në konferencën e sigurisë GLOBSEC 2023 në Bratislavë të Sllovakisë, ku po merr pjesë edhe kryeministri i Kosovës, Albin Kurti.
Sipas media, kryeministri kroat tha se Zagrebi kërkon paqe dhe ndërprerjen e shpejtë të incidenteve, duke iu referuar përleshjeve mes forcave të KFOR-it dhe protestuesve serbë në veri të Kosovës, ku të hënën u plagosën më shumë se 80 persona.
“Cilido udhëheqës në Serbi që do ta njihte Kosovën, mendoj se ai më nuk do të kishte perspektivë në karrierën e tij politike”, ka thënë ai.
Sipas tij, bashkësia ndërkombëtare duhet të ndërmjetësojë në negociata, të qetësojë situatën dhe të gjejë një zgjidhje në mënyrë që serbët në veriun e Kosovës, me shumicë serbe, të vazhdojnë të marrin pjesë në procesin demokratik.
Pa këtë, “nuk dërgohen sinjalet e besimit dhe ndërtimit të bashkëjetesës”, tha kryeministri kroat.
Disa dhjetëra ushtarë të KFOR-it, forcës së bashkësisë ndërkombëtare nën udhëheqjen e NATO-s, janë lënduar të hënën pasdite në një përleshje me protestuesit serbë në komunën e Zveçanit në veri të Kosovës./abcnews.al
