Ditën e sotme në medie u përhap shpejt lajmi se Paul Pogba do e mbyllë kontratën e tij te Manchester United dhe do transferohet në verën e ardhshme si lojtar i lirë te PSG, që është e gatshme t’i japë pagë prej 600 mijë eurosh në javë kampionit të botës.
Por Pogba nuk do jetë i vetmi objektiv i francezëve në sezonin e ardhshëm. Një tjetër lojtar i madh do jetë i lirë dhe Al Khelaifi kurrsesi nuk do e lërë pa e provuar. Bëhet fjalë për Cristiano Ronaldon, të cilit i skadon kontrata me Juventusin në verën e vitit të ardhshëm.
PSG do tentojë ta bashkojë portugezin në një skuadër me Lionel Messin për të plotësuar ëndrrën e madhe të tifozëve në mbarë botën, për të parë në një skuadër dy yjet, që kanë sunduar futbollin në dy dekadat e fundit.
Sky Sport raporton se plani është i qartë dhe ardhja e Ronaldon përkon me largimin e Mbappe,m ndërsa Pogba do mbulonte ndoshta hapësirën e vetme ku PSG ka nevojë të përforcohet. /abcnews.al
