Klodiana Çela, e cila plagosi babain e vajzës së saj pak ditë më parë në Greqi, këmbëngul se nuk i ka bërë pritë. Ndërkohë që okulisti po lufton me jetën, 49-vjeçarja ka folur nga paraburgimi ku po mbahet.
Ajo ka pohuar se vajza 12-vjeçare ka marrë çelësin e makinës për t’u fshehur në të dhe më pas, siç thotë ajo, mjeku nxori një armë dhe kërcënoi se do të vriste, shkruan Protothema, përcjell abcnews.al.
“Kishim lënë takim në orën 15.00 për ta parë fëmijën për dy minuta,” tha fillimisht 49 -vjeçarja dhe mohoi që arma me të cilën u qëllua okulisti të ishte e saj.
“Si më rezulton që ka qenë arma ime? Ishte i tij”, thekson ajo edhe pse vajza e saj i ka thënë policisë se ka çarmatosur nënën e saj.
Klodiana Çela ka deklaruar se kishte mbërritur më herët në Chalandri, sepse mezi priste të shihte vajzën. Ajo tregon gjithashtu se i ka dërguar mesazh mjekut se ka ardhur më herët, por ai dhe vajza e tyre kanë mbërritur në orën 15:00.
“Unë prisja me krahë hapur, të përqafoja vajzën. Ajo vjen drejt meje, e përqafoj fort. Në mënyrë të çuditshme, aty ku e kam në krahë, ajo rrëshqet. Në xhep kisha celularin dhe në dorën e majtë mbaja çelësin e makinës, asgjë tjetër. Fëmija kap çelësin dhe ikën jashtë. Vrapon te dera e jashtme e pallatit. Besoj se fëmija im mori çelësin për të vrapuar për t’u fshehur në makinën time në mënyrë që ta ndiqte gjithashtu. Ai në atë kohë, kishte një çantë, nxori një pistoletë dhe tha “kthehu unë do të qëlloj nënën tënde, do të vras nënën tënde, do të qëlloj”.
E shoh me pistoletë dhe nxitoj drejt tij për t’ia marrë. Disa të shtëna janë qëlluar në tavan, mur dhe derë. Mora armën, e drejtova drejt tij dhe të shtënat shpërthyen. Vajza ishte kthyer tashmë. Kur e pashë me gjak në fytyrë, mbeta e ngrirë, isha në shok, isha plotësisht e palëvizshme, nuk e di se çfarë ndodhi. Me sa duket rashë pa ndjenja. Vajza kishte rrëmbyer armën”, përfundon 49-vjeçarja. g.v/abcnews.al
