Pippo Inzaghi nuk ia doli të mbajë Beneventon në Serie A dhe aventura 2-vjeçare me “Shtrigat” ka mbaruar. Ish-sulmuesi i famshëm italian nuk ka humbur kohë dhe ka gjetur skuadrën e radhës.
47-vjeçari ka arritur akordin me Brescian, ekip që do e drejtojë nga stoli sezonin e ardhshëm. Pippo ka rënë dakord me Massimo Cellinon, presidentin e klubit.
Gazetari italian, Alfredo Pedulla raporton se marrëveshja ekonomike mes palë është gjetur, ndërsa kohëzgjatja e kontratës do të jetë 2 vite, por me opsionin e rinovimit me një tjetër vit.
Objektivi i madh është rikthimi i “Dallëndysheve” në elitën e futbollit italian. Zyrtarizimi pritet të ndodhë ditën e nesërme, teksa trajneri italian do të punojë edhe me një shqiptar: Emanuele Ndojn.
Mesfushori mirditor është pjesë e Brescias prej vitit 2016. 24-vjeçari i kombëtares luajti pak ndeshje sezonin e fundit për shkak dëmtimesh, por ia doli të shënojë 5 gola. /abcnews.al
