Një murale në Rrugën e Kombit me flamujt e shteteve mike të Kosovës.
Kështu ka zgjedhur ta kujtojë piktori Abdullah Sope 25-vjetorin e nisjes së bombardimeve të NATO-s në Kosovë, por edhe qëndresën dhe luftën e UÇK për çlirimin e Kosovës.
Kjo murale sipas piktorit, që dikur ka qenë pjesëtar i UÇK është një mënyrë falenderimi ndaj atyre shteteve që Kosovën nuk e lanë vetëm në ditë të vështira.
Gjithçka e ka kontribut personal duke e cilësuar investim të vogël, por me vlerë të madhe. Ka zgjedhur vendin më të dukshëm në Rrugën e Kombit, në segmentin Morinë – Prizren.
Për Abdullain ky projekt nuk do të jetë i fundit. Abdullah Sope me profesion është murator, por dashurinë për pikturën e ka të hershme.
Avdullai, ish pjesëtar i UÇK, sot veteran i saj kishte tjetër pritshmëri kur u fut në radhët e ushtrisë.
Në qershor, Kosova feston 25 vjetorin e çlirimit të saj. Fushata bombarduese e NATO-s, që zgjati 78 ditë, përfundoi më 10 qershor 1999, pas miratimit të Rezolutës 1244 të Këshillit të Sigurimit të OKB, me kapitullimin e Serbisë dhe tërheqjen e forcave të saj nga Kosova./abcnews.al
