Pianisti i njohur shqiptar Redi Llupa dhe violonçelisti argjentinas Sebastian Delgado dhanë një koncert në Akademinë e Shkencave. Artistët kishin përzgjedhur një repertor të larmishëm me kompozitorë të huaj dhe shqiptarë.
Nga dueti Llupa-Delgado spektatorët shijuan kompozimet e Manuel de Falla, Klod Vivie, Tonin Harapit, Vasil Toles dhe Thoma Simakut. Pianisti shqiptar Redi Llupa prej vitesh jeton në Amerikë ku zhvillon jetën artistike dhe akademike.
Ai u rikthye në Tiranë për këtë koncert, i mbushur me emocione dhe kujtime. Synimi i Redi Llupës është i qartë, thellimi mbi krijimtarinë pianistike shqiptare, që të vlerësohet ndërkombëtarisht, duke u interpretuar nga artistë të ndryshëm.
Pianisti shqiptar Redi Llupa, i cili është pjesë e kërkuesve shkencorë të Diasporës Shqiptare, është gjithashtu një ambasador i vendit të tij përmes muzikës. Koncerti u organizua nga Diaspora Artistike dhe Shkencore në SHBA, në bashkëpunim me Ministrinë e Diasporës në Tiranë./ABC News Albania 24/7
